ការជ្រើសរើសមុខជំនាញរៀនខុស ជាកត្តាធ្វើឲ្យយុវជន គ្មានការងារធ្វើ
ភ្នំពេញ៖ ថ្លែងនៅក្នុងវេទិកាពិភាក្សាស្ដីពី ការលើកកម្ពស់ការបណ្ដុះ បណ្ដាលវិជ្ជាជីវៈ ជាកម្លាំងជំរុញសេដ្ឋកិច្ច នៅសណ្ឋាគារ Himawari លោក ឡៅ ហ៊ីម អគ្គនាយកអប់រំបណ្ដុះបណ្ដាលបច្ចេកទេស និងវិជ្ជាជីវៈនៃក្រសួងការងារ បណ្ដុះបណ្ដាល និងវិជ្ជាជីវៈ បានមានប្រសាសន៍ថា យុវជនភាគច្រើនតែងតែរើស មុខជំនាញរៀនខុស និងតម្រូវការសង្គម ជាក់ស្ដែងជាដើមចមធ្វើឲ្យយុវជន គ្មានការងារធ្វើ។
លោកបន្តថា ” ពួកគាត់មិនសូវជាចាប់អារម្មណ៍ និងការរៀនមុខជំនាញឲ្យវាសមស្រប និងសង្គមយើងជាក់ស្ដែងទេថា តើបច្ចុប្បន្នមុខជំនាញអ្វី គេត្រូវការជាចាំបាច់នោះក្នុងប្រទេសកម្ពុជា និងស្របទៅតាមបច្ចេកទេសរីកចម្រើន របស់ប្រទេសក្បែរខាងនោះ”។
លោកបន្តទៀតថា ទីផ្សារការងារនៅក្នុងប្រទេស ត្រូវការយុវជនមានសម្ថភាព និងមានជំនាញពិតប្រាកដ ហើយថា សម្រាប់ទីផ្សារសមាហរណកម្មអាស៊ាន ឆ្នាំ២០១៥ខាងមុខនេះ រដ្ឋាភិបាលត្រៀមខ្លួនជាស្រេច ក្នុងការ ប្រកួតប្រជែងជាមួយប្រទេសក្នុងតំបន់ ប៉ុន្តែសម្រាប់សមត្ថភាពប្រកួតប្រជែង ប៉ុណ្ណានោះលោក មិនអាចវាយតំលៃបានទេអាស្រ័យលើយុវជនខ្លួនឯង។
ជាមួយគ្នានេះ លោកឯកអគ្គរដ្ឋទូត William E. Todd ក៏បានលើកឡើងនៅក្នុងវេទិកានោះដែរ ជោគជ័យនៅពេលអនាគតរបស់កម្ពុជា ពឹងផ្អែកលើការធ្វើអោយយុវជន នៃប្រទេសនេះមានការអប់រំល្អនិង មានជំនាញចាំបាច់ដើម្បីទទួលបានជោគជ័យ ក្នុងសេដ្ឋកិច្ចបែបសាកលភាវូបនីយកម្ម នាសម័យបច្ចុប្បន្ន ហើយការបណ្តុះបណ្តាលវិជ្ជាជីវៈ អាចនឹងគួរតែដើរតួនាទីសំខាន់ ក្នុងការបំពេញសេចក្តីត្រូវការនេះ៕ Cambodia News
