ការរំលោភផ្លូវភេទកុមារក្នុងប្រទេសឥណ្ឌាកើនឡើងបីដងក្នុងទសវត្សរ៍ចុងក្រោយនេះ
អ្នក ការពារសិទ្ធិមនុស្សមួយក្រុមក្នុងប្រទេសឥណ្ឌានិយាយថា ការបំពានផ្លូវភេទកុមារបានរាលដាលដល់កម្រិតមួយខ្ពស់ ដោយមានការរំលោភផ្លូវភេទកុមារកើនឡើង៣ដង ក្នុងទសវត្សរ៍ចុងក្រោយនេះ ដែលនាំឲ្យមានតួលេខបំពានផ្លូវភេទកុមារចំនួន ៤ម៉ឺន ៨ពាន់ករណីក្នុងមួយឆ្នាំ។
តួលេខនេះបានមកពីរបាយការណ៍ របស់មជ្ឈមណ្ឌលអាស៊ីដើម្បីសិទ្ធិមនុស្ស ដែលបានបង្ហាញដល់ប្រេសិតពិសេសរបស់អង្គការសហប្រជាជាតិលើបញ្ហាអំពើ ហិង្សាប្រឆាំងស្ត្រី។
នាយក ក្រុមការពារសិទ្ធិមនុស្សលោក Su-has Chak-ma បានប្រាប់វិទ្យុអូស្ត្រាលីថា ការកើនឡើងនៃករណីបំពានផ្លូវភេទកុមារ គឺធ្វើឲ្យបណ្ដាពលរដ្ឋនៃប្រទេសឥណ្ឌាទាំងមូលមានអារម្មណ៍ខឹង សម្បារយ៉ាងខ្លាំង។
លោក មានប្រសាសន៍ថា ការកើនឡើងនេះបណ្តាលមកពីការមិនខ្លាចច្បាប់ និងគំនិតរបស់ឧក្រិដ្ឋជនដែលយល់ថា ពួកគេនឹងមិនមានការទទួលទោស ហើយទាំងនេះក៏ដោយសារកត្តាចម្បងចំនួនពីរ៖ ទីមួយពីព្រោះប៉ូលិសខ្លួនឯង មិនទទួលខុសត្រូវចំពោះតួនាទី និងទីពីរ តុលាការទទួលបានករណីដូច្នេះច្រើនលើសលប់ ដែលធ្វើឲ្យមានភាពយឺតយ៉ាវរាប់ឆ្នាំ មុននឹងតុលាការអាចបញ្ចប់ការការកាត់ក្ដីណាមួយបាន៕(Radio Australia)
