អ៊ីស្រាអែលចោទរដ្ឋាភិបាលស៊ីរីថាបានប្រើប្រាស់អាវុធគីមី
នៅថ្ងៃអង្គារម្សិលមិញនេះ អ្នកទទួលខុសត្រូវផ្នែកចារកិច្ចអ៊ីស្រាអែលមួយរូប បានចោទរដ្ឋាភិបាលស៊ីរីរបស់លោកអាសាដ ថាបានប្រើប្រាស់អាវុធគីមីក្នុងការប្រយុទ្ធជាមួយក្រុមឧទ្ទាម ក្នុងពេលកន្លងមក។ ប៉ុន្តែ អាមេរិកបានប្រតិកម្មតបទៅវិញថា នៅមិនទាន់អាចសន្និដ្ឋានបាននៅឡើយទេ ថាតើរដ្ឋអំណាចលោក អាសាដពិតជាបានប្រើប្រាស់អាវុធគីមីមែនរឺក៏យ៉ាងណា។
“អាសាដប្រើអាវុធគីមីនៅស៊ីរី” នេះគឺជាការសរសេរចោទប្រកាន់របស់ឧត្តមសេនីយអ៊ីស្រាអែល Itaï Brun ទៅលើរដ្ឋាភិបាលលោកអាសាដ នៅលើបណ្តាញសង្គម Tweetter ផ្លូវការរបស់ទ័ពអ៊ីស្រាអែល។
លោក Itaï Brun ជាប្រធានមន្ទីរវិភាគស្រាវជ្រាវនៃផ្នែកចារកិច្ចកងទ័ពអ៊ីស្រាអែល បានចេញសេចក្តីសន្និដ្ឋាន នៅថ្ងៃអង្គារម្សិលមិញនេះ ចោទប្រកាន់រដ្ឋាភិបាលស៊ីរីថា បានប្រើប្រាស់អាវុធគីមី ក្នុងការប្រយុទ្ធជាមួយក្រុមឧទ្ទាម ក្នុងរយៈពេលប៉ុន្មានខែចុងក្រោយនេះ។
យោងតាមកោសលវិច័យផ្នែកចារកិច្ចអ៊ីស្រាអែល រន្ធប្រស្រីភ្នែករបស់ជនរងគ្រោះបានត្រូវបង្រួញខ្លី ហើយមានពពុះមាត់និងសញ្ញាផ្សេងៗទៀតដែលបង្ហាញថា គឺបង្កឡើងដោយអាវុធ គីមីដែលរដ្ឋអំណាចប្រធានាធិបតីអាសាដបាន ប្រើប្រាស់។
ប៉ុន្តែអាមេរិកបានតបទៅវិញថា អាមេរិកគាំទ្រការស៊ើបអង្កេតរបស់អ៊ីស្រាអែល ប៉ុន្តែអាមេរិកមិនទាន់អាចសន្និដ្ឋានដូចអ៊ីស្រាអែលបាននៅឡើយទេ។ អ្នកនាំពាក្យសេតវិមាន លោក Jay Carney បានប្រាប់ថា អាមេរិកនឹងធ្វើការស៊ើបអង្កេតផ្ទៀងផ្ទាត់នូវការសន្និដ្ឋានរបស់ អ៊ីស្រាអែល។ ទន្ទឹមនេះដែរ ប្រមុខការទូតអាមេរិក Jonh Kerry បានប្រាប់ថា នាយករដ្ឋមន្ត្រីអ៊ីស្រាអែល Benjamin Netanyahu មិនបានបញ្ជាក់ប្រាប់លោក អំពីការដែលថាប្រធានាធិបតីអាសាដបានប្រើប្រាស់អាវុធគីមី នៅស៊ីរីនោះឡើយ។ អ្នកនាំពាក្យរបស់នាយករដ្ឋមន្ត្រីអ៊ីស្រាអែលបានបដិសេធ មិនធ្វើអត្ថាធិប្បាយទាក់ទងនឹងបញ្ហានេះ។
គួររំលឹកឡើងវិញថា ក្រុងWashington ធ្លាប់បានព្រមានរដ្ឋាភិបាលស៊ីរីថា ត្រូវតែទទួលខុសត្រូវប្រសិនបើស៊ីរីប្រើប្រាស់អាវុធគីមី។ កាលពីថ្ងៃ១៨ មេសា កន្លងទៅ អាមេរិកបានប្រាប់ថា ខ្លួនកំពុងស៊ើប អង្កេតរកមើលថា តើមានការប្រើប្រាស់អាវុធគីមីជាយថាហេតុណាមួយ នៅស៊ីរីដូចជាការចោទប្រកាន់របស់បណ្តាបស្ចិមប្រទេសដែររឺទេ។
កន្លងមក បារាំងនិងអង់គ្លេសបានរាយការណ៍ទៅអង្គការសហប្រជាជាតិថា ការត្រួតពិនិត្យនិងការសាកសួរសាក្សីនិងក្រុមឧទ្ទាមជាច្រើននាក់ បានបង្ហាញថា មានការប្រើប្រាស់នូវជាតិពុលដល់សសៃប្រសាទ នៅក្រុងអាឡេប និងក្រុងហ៊ម ក្នុងប្រទេសស៊ីរី៕ដោយ ព្រំ សឿន សូលីណា (RFI)