រ៉ឺម៉កម៉ូតូ បុកម៉ូតូបណ្តាលឲ្យអ្នកបើកម៉ូតូបែកប្រអប់ជើង
ភ្នំពេញ ៖ កាលពីវេលាម៉ោង១ និង៥ នាទីរំលងអធ្រាត្រឈានចូលថ្ងៃទី២៨ ធ្នូ រ៉ឺម៉កម៉ូតូ បុកគ្នាជាមួយម៉ូតូ ធ្វើឲ្យម៉ូតូដួលកណ្តាលផ្លូវ បណ្តាលឲ្យអ្នកបើកម៉ូតូបែកប្រអប់ជើងខាងឆ្វេង រត់ដេញតាមកាក់រ៉ឺម៉កម៉ូតូជាប់ ស្ថិតនៅចំណុចផ្លូវលេខ១៣កែង៩៤ ក្នុងសង្កាត់វត្តភ្នំ ខណ្ឌដូនពេញ ។
ប្រភពព័ត៌មានពីកន្លែងកើតហេតុ បានឲ្យដឹងថា រ៉ឺម៉កម៉ូតូបើកតាមផ្លូវលេខ១៣ ពីត្បូងទៅ ជើង ចំណែកម៉ូតូគ្រីស្តាល់ ពណ៌ខ្មៅ ជិះតាមផ្លូវលេខ១៣ ពីជើងទៅត្បូង ក្នុងទិសដៅបញ្រ្ចាសទិសគ្នា ខណៈមកដល់ចំណុចផ្លូវកែងបើកទៅបុកកង់ក្រោយរ៉ឺម៉កម៉ូតូចំហៀងខាងស្តាំ បាក់យ៉ាន់ ខ្ទាតកៅស៊ូចេញក្រៅម៉ូតូ បណ្តាលឲ្យម៉ូតូដួលច្រងាងនៅកណ្តាលផ្លូវ ហើយអ្នកបើកម៉ូតូគ្រីស្តាល់ បែកប្រអប់ជើងខាងស្តាំ ។
ក្រោយពេលកើតហេតុ អ្នកបើកម៉ូតូគ្រីស្តាល់ភ្លេចគិតថាខ្លួនឯងមានរបួស បានរត់ដេញ តាម ចាប់រ៉ឺម៉កម៉ូតូដែលបើករត់តាមផ្លូវលេខ៩៤ ទៅដល់មុខអគ្គិសនីកម្ពុជា ទើបស្ទាក់ម៉ូតូ បាន ។ ចំណែកអ្នកបើកម៉ូតូបន្ទាប់ពីស្ទាក់រ៉ឺម៉កម៉ូតូបានហើយ ទើបក្រឡេកឃើញជើងហូរ ឈាមកក្លាក់ បន្ទាប់មកត្រូវរថយន្តសង្គ្រោះដឹកយកទៅព្យាបាលនៅមន្ទីរពេទ្យកាល់ម៉ែត ។ រ៉ឺម៉កម៉ូតូ និងម៉ូតូ ត្រូវសមត្ថកិច្ចធ្វើការវាស់វែង យកទៅរក្សាទុក នៅខណ្ឌដូនពេញ ៕
ដោយ៖ ហេង នាង
