សម្តេច ស ខេង ប្រកាសលើកពេលផាកពិន័យអ្នកជិះម៉ូតូគ្មានប័ណ្ណបើកបរ
សារព័ត៌មាន Cambodia News/
ភ្នំពេញ (៣១ ធ្នូ ២០១៥) ៖ ថ្លែងនៅក្នុងកិច្ចប្រជុំត្រួតពិនិត្យនិងការត្រៀមលក្ខណៈអនុវត្តច្បាប់ចរាចរណ៍ផ្លូវគោកថ្មី ដែលធ្វើឡើងនៅទីស្តីការក្រក្រសួងមហាផ្ទៃ នៅព្រឹកថ្ងៃព្រហស្បតិ៍នេះ រដ្ឋមន្រ្តីក្រសួងមហាផ្ទៃ សម្តេច ស ខេង បានថ្លែងថាការផាកពិន័យអ្នកជិះម៉ូតូគ្មានប័ណ្ណបើកបរ នឹងមិនអនុវត្តចាប់ពីថ្ងៃទី០១ ខែមករា ឆ្នាំ២០១៦នោះទេ។
ការប្រកាសផាកពិន័យអ្នកជិះម៉ូតូគ្មានប័ណ្ណបើកបរ នឹងមិនអនុវត្តចាប់ពីថ្ងៃទី០១ ខែមករា ឆ្នាំ២០១៦នេះ បន្ទាប់ពី សម្តេច ហ៊ុន សែន បានបញ្ជាឲ្យផ្អាកបណ្តោះអាសន្នពីការធ្វើប័ណ្ណបើកបរឡានម៉ូតូ។ សម្តេច ស ខេង បន្តថា បន្ទាប់ពីការកំណត់តម្លៃ រដ្ឋាភិបាលនឹងទុករយៈពេលយ៉ាងតិច៣ខែសម្រាប់ប្រជាពលរដ្ឋទៅធ្វើប័ណ្ណបើកបរ មុននឹងការអនុវត្តច្បាប់។
សម្តេច ស ខេង បានបញ្ជាក់ផងដែរថា នៅរាជធានីភ្នំពេញ ម៉ូតូមានប្រមាណ១,២លានគ្រឿង ហើយក្នុងនោះអ្នកបើកបរប្រមាណ៧ម៉ឺននាក់ប៉ុណ្ណោះដែលមានប័ណ្ណបើកបរ។
គួរបញ្ជាក់ថាកាលពីថ្ងៃពុធ សម្តេច ហ៊ុន សែន បានបញ្ជាឲ្យក្រសួងសាធារណការនិងដឹកជញ្ជូនផ្អាកបណ្តោះអាសន្នការធ្វើប័ណ្ណបើកបរម៉ូតូឡានក្រោយពីសម្តេច បានទទួលការត្អូញត្អែរពីប្រជាពលរដ្ឋតាមរយៈហ្វេសប៊ុករបស់សម្តេចថា តម្លៃធ្វើប័ណ្ណបើកបរថ្លៃពេក។
ការផាកពិន័យដែលនឹងត្រូវអនុវត្តនៅដើមឆ្នាំក្រោយ មានដូចជាផាកពិន័យអ្នកជិះម៉ូតូដែលមិនឲ្យអ្នកធ្វើដំណើរពីខាងក្រោយពាក់មួកសុវត្ថិភាព អ្នកបើកបរនិយាយទូរស័ព្ទ និងអ្នកជិះម៉ូតូទាំងឡាយដែលបង្កការរំខាននៅតាមដងផ្លូវ។ សមត្ថកិច្ចនឹងពិន័យអ្នកបើកបរយានយន្តដែលមិនបានភ្ជាប់តាមខ្លួននូវឯកសារដើមរួមមានបណ្ណបើកបរយានយន្ត បណ្ណសម្គាល់យានយន្ត វិញ្ញាបនបត្រត្រួតពិនិត្យលក្ខណៈបច្ចេកទេសយានយន្ត ឬលិខិតអនុញ្ញាតធ្វើអាជីវកម្មចំពោះរថយន្តដែលប្រកបអាជីវកម្មដឹកជញ្ជូន៕
