ក្មេងស្រី អាយុ ៥ឆ្នាំ ត្រូវម្តាយចិញ្ចឹម ចាក់ច្រវ៉ាក់ជើងជាប់នឹងសសរផ្ចះជិតពីរឆ្នាំ
សារព័ត៌មាន Cambodia News/
កោះកុង (០៥ កក្កដា ២០១៤) ៖ មានកុមារីអាយុ ៥ ឆ្នាំម្នាក់ ត្រូវបានម្តាយចិញ្ចឹម ធ្វើបាប ដោយចាក់សោរច្រវ៉ាក់ជើងជាប់នឹងសសផ្ចះ មិនឱ្យចេញ ទៅណា អស់រយៈពេលជិតពីរឆ្នាំមកហើយ។
រឿងរ៉ាវមួយនេះ ត្រូវបានបែកធ្លាយ ក្រោយពីប្រជាពលរដ្ឋ រស់នៅក្នុងភូមិ កណ្ដាលព្រៃមួយជាមួយគ្នានេះ បាន រាយការណ៍ទៅមន្ដ្រី របស់សមាគមសិទ្ធិ មនុស្សអាដហុក ហើយមន្ដ្រីអាដហុក បានសហការជាមួយមន្ត្រីជំនាញ និងនគរបាល បានចុះជួយរំដោះក្មេងស្រីកំសត់រូបនោះ។
កុមារី រងគ្រោះឈ្មោះ ភី ចន្ថា អាយុ ៥ឆ្នាំ ដែលត្រូវបានម្តាយចិញ្ចឹមឈ្មោះ ពៅ ស៊ីផាត់ អាយុ ៤៣ឆ្នាំ យកច្រវ៉ាក់ប្រវែង ១ម៉ែត្រ ចងបង្ខាំងទុករយៈពេលជិត ៨ម៉ោង រៀងរាល់ថ្ងៃ និងជិត ២ឆ្នាំ នៅចំណុចតំបន់ ២៩៧ ភូមិបឹងឃុនឆាង សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។
តាមការបញ្ជាក់ពីមន្ត្រី របស់សមាគមសិទ្ធិ មនុស្សអាដហុក ប្រចាំខេត្តកោះកុងមន្ដ្រី បានឲ្យដឹងថា ករណីនេះ សមត្ថកិច្ចមិនឃាត់ខ្លួនឡើយ គឺបានត្រឹមអប់រំ ព្រោះជាស្រ្តីមេម៉ាយក្រីក្រ ហើយស្ត្រីម្តាយចិញ្ចឹមឆ្លើយថា បើគាត់យកត្រឡប់ទៅ គាត់និង ដាក់ច្រវ៉ាក់ដដែល ព្រោះគាត់គ្មានជំរើស៕
