សម្ដេចហ៊ុន សែន៖ ខ្ញុំមិនមែនជានាយករដ្ឋមន្ត្រីហ្វ៊េសប៊ុកទេ
សារព័ត៌មាន Cambodia News/
ភ្នំពេញ (២៨ ធ្នូ ២០១៥) ៖ ថ្លែងនៅក្នុងពិធីចែកសញ្ញាបត្រដល់និស្សិត នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នាព្រឹកថ្ងៃទី២៨ ធ្នូ នេះ សម្ដេចហ៊ុន សែន នាយករដ្ឋមន្ត្រីនៃព្រះរាជណាចក្រកម្ពុជា បានលើកឡើងថា “ខ្ញុំ មិនមែនជានាយករដ្ឋមន្ត្រីហ្វ៊េសប៊ុកទេ តែ ខ្ញុំគឺជានាយករដ្ឋមន្ត្រីពិត”។
សម្ដេចក៏បានសង្កត់ធ្ងន់ថា សម្តេចមិនមែនជានាយករដ្ឋមន្ត្រីហ្វ៊េសប៊ុកទេ ក៏ប៉ុន្តែការប្រើបណ្ដាញសង្គមហ្វ៊េសប៊ុកគឺដើម្បីទទួលព័ត៌មានពីគ្រប់ប្រភពទាំងអស់។
សម្ដេចបញ្ជាក់ថា រាល់ថ្ងៃសម្ដេចបានប្រើទាំងហ្វ៊េសប៊ុក ទាំង Twitter និងវេបសាយជាដើម។ ទន្ទឹមនឹងនេះសម្ដេចបានទទួលព័ត៌មានពីគ្រប់ទិសទីទាំងអស់ មានទាំងគ្រប់ក្រសួងស្ថាប័ន មន្ត្រីរាជការ ប្រជាពលរដ្ឋ និងគណបក្សប្រឆាំងផងដែរ។
បច្ចុប្បន្នអ្នកគាំទ្រទំព័រហ្វ៊េសប៊ុករបស់ថ្នាក់ដឹកនាំរដ្ឋាភិបាលមួយរូបនេះមានចំនួន ជាង ១លាន ៦សែន នាក់ ព្រមទាំងមានការកើនឡើងជាលំដាប់ បន្ទាប់ពីសម្ដេចបានប្រកាសប្រើប្រាស់ហ្វ៊េសប៊ុកជាផ្លូវការនាឆ្នាំ២០១៥ នេះ៕
