អតីតអ្នកបុរីកីឡា គំរាមសង់ផ្ទះនៅកន្លែងចាស់វិញ
Cambodia News
ភ្នំពេញ៖ នៅថ្ងៃទី០៣ ខែមេសានេះ អតីតអ្នកភូមិបុរីកីឡា៤៥គ្រួសារ ដែលកំពុងបោះតង់ រស់នៅលើគំនរសំរាមបណ្តោះអាសន្ន ដោយសារក្រុមហ៊ុនផានអ៊ីម៉ិចបណ្តេញចេញកាលពីជាងមួយឆ្នាំមុននោះបានធ្វើការគំរាមសង់ផ្ទះនៅកន្លែងចាស់វិញ ប្រសិនបើអាជ្ញាធរពាក់ព័ន្ធមិនអាចរកដំណោះស្រាយបាន។
ក្រុមអ្នកតវ៉ាអះអាងប្រាប់អ្នកសារព័ត៌មាន នៅមុខសាលារាជធានីភ្នំពេញ នាថ្ងៃទី៣ ខែមេសានេះ ថា ក្រុមហ៊ុនផានអ៊ីម៉ិច បានបណ្តេញពួកគេចេញដោយហិង្សាកាលពីជាងមួយឆ្នាំមុន ដោយគ្នានផ្តល់សំណងឡើយ។
ក្រុមអ្នកតវ៉ាភាគច្រើនជាស្ត្រីទាំងនោះបន្តថា មកដល់ពេលនេះ អាជ្ញាធរពាក់ព័ន្ធពិសេសមន្ត្រីនៅសាលារាជធានីភ្នំពេញ អត់សមត្ថភាពជំរុញឲ្យក្រុមហ៊ុន ផ្តល់សំណងជូនពួកគេទេ។ ពួកគេថាជម្រើសតែមួយគត់ គឺមកសង់លំនៅឋានថ្មីនៅលើដីចាស់វិញ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ សុំមិនធ្វើអត្ថាធិប្បាយជុំវិញការលើកឡើងរបស់អ្នកភូមិនេះទេ ដោយអះអាងថា លោកកំពុងជាប់រវល់ ប៉ុន្តែតំណាងអ្នកភូមិដែលបានចូលដាក់ញត្តិ អ្នកស្រី ជុំ ង៉ាន់ អះអាងថា មន្ត្រីនៅសាលារាជធានីសន្យាផ្តល់ចម្លើយនៅសប្តាហ៍ក្រោយ៕
