រថយន្តសណ្តោងស៊ីទែនប្រេង បត់ឆ្វេងបុកម៉ូតូសង់កូរ៉េ រងរបួស ២ នាក់
ភ្នំពេញ ៖ នៅវេលាម៉ោង១០និង៣០នាទីយប់ថ្ងៃទី២៧ ធ្នូ រថយន្តហ៊ីណូ ដឹកស៊ីទែនប្រេងបត់ឆ្វេងទទឹងផ្លូវច្រងាង បុកម៉ូតូសង់កូរ៉េ បណ្តាលឲ្យរងរបួសធ្ងន់ម្នាក់ ស្រាលម្នាក់ ស្ថិតនៅតាមផ្លូវជាតិលេខ១កែង៣៦៧ ជិតផ្សារច្បារអំពៅ ក្នុងសង្កាត់ច្បារអំពៅ ខណ្ឌមានជ័យ ។
ប្រភពព័ត៌មានបានឲ្យដឹងថា រថយន្តហ៊ីណូដឹកស៊ីទែនប្រេង ពណ៌ខៀវ បើកតាមផ្លូវលេខ៣៦៧ ពីត្បូងទៅជើង ចំណែកម៉ូតូសង់កូរ៉េ ពណ៌ក្រហម ជិះគ្នា ២នាក់តាមផ្លូវជាតិលេខ១ ពីកើតទៅលិច ខណៈមកដល់ចំណុចផ្លូវកែង រថយន្តហ៊ីណូបត់ឆ្វេងទទឹងផ្លូវច្រងាង នៅចំណុចផ្លូវងងឹតផងធ្វើឲ្យអ្នកម៉ូតូមើលអត់ឃើញ ជិះទៅបុករថយន្ត បណ្តាលឲ្យដួលរងរបួសធ្ងន់អ្នកបើកម៉ូតូ រីឯអ្នកជិះពីក្រោយរងរបួសស្រាល ។
ក្រោយពេលកើតហេតុរថយន្តសង្គ្រោះគី្លនិកចាក់អង្រែលើ ដឹកជនរងគ្រោះ យកទៅព្យាបាល ។ ដោយឡែក អ្នកបើកបររថយន្តហ៊ីណូ បានរត់គេចខ្លួន នៅសល់តែរថយន្តនិងម៉ូតូ ត្រូវសមត្ថកិច្ចយកទៅរក្សាទុក នៅអធិការដ្ឋាននគរបាលខណ្ឌមានជ័យ ៕
ដោយ៖ ហេង នាង