ក្រុមហ៊ុន Huawei រៀបចំកម្មវិធី “Train the Trainer” ក្រៅបណ្តាញលើកដំបូងនៅមជ្ឈមណ្ឌលបណ្តុះបណ្តាលរួម ICT Talent ក្នុងតំបន់ ដែលផ្តល់អំណាចដល់ការអប់រំ AI នៅទូទាំងប្រទេសកម្ពុជា និងឡាវ
Cambodia News
ភ្នំពេញ៖ កម្មវិធី «បណ្ដុះបណ្ដាលគ្រូ (Train the Trainer)» ក្រៅបណ្តាញ (offline) ដំបូងគេត្រូវបានបើកដំណើរការកាលពីថ្ងៃចន្ទ នៅមជ្ឈមណ្ឌលបណ្តុះបណ្តាលទេពកោសល្យព័ត៌មានវិទ្យា និងទំនាក់ទំនងកម្រិតតំបន់ក្នុងគោលបំណងពង្រឹងការអប់រំបញ្ញាសិប្បនិម្មិត (AI) និងសមត្ថភាពបង្រៀនឌីជីថលនៅទូទាំងប្រទេសកម្ពុជា និងឡាវ។
វគ្គបណ្តុះបណ្តាលរយៈពេលប្រាំថ្ងៃ ដែលធ្វើឡើងចាប់ពីថ្ងៃទី ២០ ដល់ថ្ងៃទី ២៤ ខែតុលា ឆ្នាំ ២០២៥ បានប្រមូលផ្តុំគ្រូជាង ៣០នាក់ និងអ្នកជំនាញផ្នែកសិក្សាមកពីសាកលវិទ្យាល័យ ICT Academy កំពូលទាំង៩នៅទូទាំងប្រទេសកម្ពុជា និងឡាវ ជាជំហានដ៏សំខាន់មួយឆ្ពោះទៅរកការឈានទៅមុខនៃការអប់រំ Artificial Intelligence (AI) និងការអភិវឌ្ឍន៍ទេពកោសល្យឌីជីថលនៅក្នុងតំបន់។
យោងតាមអ្នករៀបចំកម្មវិធីបានឱ្យដឹងថា៖ «គំនិតផ្តួចផ្តើម បណ្ដុះបណ្ដាលគ្រូ (Train the Trainer) គឺជាកម្មវិធីពង្រឹងសមត្ថភាពវិជ្ជាជីវៈដែលត្រូវបានបង្កើតឡើងដើម្បីផ្តល់សិទ្ធិអំណាចដល់គ្រូបង្រៀននៅសាកលវិទ្យាល័យ និងវិទ្យាស្ថានវិជ្ជាជីវៈ ជាមួយនឹងចំណេះដឹង និងជំនាញគរុកោសល្យដែលត្រូវការដើម្បីបង្រៀនបច្ចេកវិទ្យា ICT និង AI ដែលកំពុងរីកចម្រើន»។
តាមរយៈកម្មវិធីនេះ អ្នកចូលរួមទទួលបានការបណ្តុះបណ្តាលស៊ីជម្រៅលើមូលដ្ឋានគ្រឹះ AI លំហាត់សហការ និងការចែករំលែកបទពិសោធន៍ ដើម្បីពង្រឹងសមត្ថភាពរបស់ពួកគេក្នុងការបង្រៀនគំនិតឌីជីថលកម្រិតខ្ពស់ប្រកបដោយប្រសិទ្ធភាពនៅក្នុងស្ថាប័នរៀងៗខ្លួន។
អ្នករៀបចំបាននិយាយថា៖ «កម្មវិធីនេះគឺជាជំហានឆ្ពោះទៅរកការកសាងប្រព័ន្ធអេកូឡូស៊ីដែលមានទេពកោសល្យក្នុងតំបន់ប្រកបដោយនិរន្តរភាព ដែលស្របតាមក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ ក៏ដូចជាគោលដៅនៃការផ្លាស់ប្តូរឌីជីថលក្នុងតំបន់យ៉ាងទូលំទូលាយ»។
បន្ទាប់ពីជោគជ័យនៃវគ្គផ្តោតលើ AI នេះ វគ្គបណ្តុះបណ្តាលវគ្គទីពីរស្តីពីកុំព្យូទ័រ គ្រោងនឹងប្រព្រឹត្តទៅនៅខែវិច្ឆិកា ដោយបន្តកិច្ចខិតខំប្រឹងប្រែងដើម្បីពង្រីកកិច្ចសហប្រតិបត្តិការក្នុងតំបន់ និងពង្រឹងសមត្ថភាពអប់រំ ICT នៅទូទាំងអាស៊ីអាគ្នេយ៍។
ការបញ្ចប់ដោយជោគជ័យនៃវគ្គបណ្តុះបណ្តាល AI រយៈពេលប្រាំថ្ងៃនេះ នឹងបញ្ជាក់ពីប្រសិទ្ធភាពនៃកម្មវិធី និងការរួមចំណែកបន្តរបស់ក្រុមហ៊ុន Huawei ក្នុងការជំរុញការអប់រំឌីជីថលនៅកម្ពុជា និងឡាវ។
គាំទ្រដោយគំនិតផ្តួចផ្តើមរបស់រដ្ឋាភិបាល និងសហការជាមួយសាកលវិទ្យាល័យឈានមុខគេមកពីប្រទេសទាំងពីរ កម្មវិធី បណ្ដុះបណ្ដាលគ្រូ (Train the Trainer) បន្តពង្រឹងការអភិវឌ្ឍន៍ទេពកោសល្យ ICT និង AI ដោយផ្ដោតលើជំនាញឌីជីថលនៅទូទាំងតំបន់៕
