ក្រសួងអប់រំដាក់ទណ្ឌកម្មដល់គ្រូបង្រៀនម្នាក់ករណីអសីលធម៌ក្នុងពេលបង្រៀន
សារព័ត៌មាន Cambodia News/
ភ្នំពេញ (១៥ តុលា ២០១៥) ៖ ក្រសួងអប់រំ យុវជន និងកីឡា បានដាក់ការដាក់ទណ្ឌកម្មខាងវិន័យដល់គ្រូបង្រៀនម្នាក់នៅខេត្តស្វាយរៀង លើករណីដាក់ទណ្ឌកម្មដល់សិស្សស្រីដោយអសីលធម៌ក្នុងពេលបង្រៀន។
ការដាក់ទណ្ឌកម្មខាងវិន័យដល់គ្រូបង្រៀងរូបនេះ បន្ទាប់ពីក្រសួងអបរំ បានសង្កេតឃើញថា កាលពីពេលថ្មីៗនេះ មានសារព័ត៌មានក្នុងស្រុកមួយចំនួនផ្សព្វផ្សាយករណីលោកគ្រូឈ្មោះដួង សានេត ដាក់ទណ្ឌកម្មលើសិស្សស្រី ដោយទាមទារឱ្យមានការរកយុត្តិធម៌ជូនសិស្សស្រីរងគ្រោះនោះឱ្យបានសមស្រប។ នេះបើយោងតាមសេចក្តីប្រកាសព័ត៌មានរបស់ក្រសួងអប់រំ ចុះថ្ងៃទី១៤ ខែតុលា ឆ្នាំ២០១៥។
សេចក្តីប្រកាសព័ត៌មានដដែលបានបញ្ជាក់ថា ការដាក់ទណ្ឌកម្មខាងវិន័យដល់លោកគ្រូដួង សានេត គឺស្របតាមមាត្រា៤០នៃច្បាប់ស្តីពីសហលក្ខនិ្តកៈមន្ត្រីរាជការស៊ីវិលនៃព្រះរាជាណាចក្រកម្ពុជា។ រីឯទណ្ឌកម្មខាងផ្លូវច្បាប់ផ្សេងទៀត គឺជាសមត្ថកិច្ចរបស់តុលាការ ដែលក្រសួងអប់រំ ពុំមានសមត្ថកិច្ចធ្វើអន្តរាគមន៍ឡើយ៕
