គណៈកម្មការចម្រុះបក្សទាំងពីរ នឹងជួបគ្នាលើកទី២ នៅព្រឹកនេះ
សារព័ត៌មាន Cambodia News/
ភ្នំពេញ(១០ មីនា ២០១៤)៖ នៅថ្ងៃទី១០ ខែមីនា វេលាម៉ោង ៩ព្រឹកនេះ គណៈកម្មការចម្រុះកែទម្រង់ការបោះឆ្នោត គណបក្សប្រជាជនកម្ពុជា និងគណបក្សសង្គ្រោះជាតិ នឹងជួបគ្នាជាលើកទី២ នៅវិមានព្រឹទ្ធសភា ដើម្បីបន្តកិច្ចពិភាក្សាលើក្របខណ្ឌកំណែទម្រង់ការបោះឆ្នោតនាពេលខាងមុខ។
សម្រាប់កិច្ចប្រជុំថ្ងៃទី១០ ខែមីនានេះ គណៈកម្មការបក្សទាំងពីរ នឹងពិភាក្សាលម្អិតលើចំណុចពីរ ដែលបានឯកភាពគ្នា កាលពីថ្ងៃទី៣ ខែមីនា នោះគឺ ការធ្វើកំណែទម្រង់ការចុះឈ្មោះបោះឆ្នោត និងបញ្ជីឈ្មោះបោះឆ្នោត រួមនឹងការរៀបចំបង្កើតច្បាប់ស្តីពីហិរញ្ញវត្ថុគណបក្ស។
ទន្ទឹមនេះ គណៈកម្មការបក្សទាំងពីរ នឹងបន្តពិភាក្សាលើការកែទម្រង់ស្ថាប័នបោះឆ្នោត យន្តការដោះស្រាយវិវាទ និងការធានាភាពស្មើគ្នាលើប្រព័ន្ធផ្សព្វផ្សាយជាដើម ដែលបានពិភាក្សា។
តាមរយៈលទ្ធផលនេះ អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ ឲ្យដឹងថាសមាសភាពគណៈកម្មការចម្រុះគណបក្សប្រជាជនកម្ពុជា ដឹកនាំដោយលោក ប៊ិន ឈិន និងសមាជិក លោក ជាម យៀប លោក ឈាង វុន លោក ប៉ែន បញ្ញា លោក ស៊ិក ប៊ុនហុក និងលោកស្រី គ្រួច សំអាន។
ចំណែកគណបក្សសង្គ្រោះជាតិ ដឹកនាំដោយលោក សុន ឆ័យ និងសមាជិក លោក យឹម សុវណ្ណ លោក គួយ ប៊ុនរឿន លោក អេង ឆៃអ៊ាង លោក ម៉ៅ មុន្នីវណ្ណ និងលោក យ៉ែម បុញ្ញឫទ្ធិ៕
