យុវជនស្ម័គ្រចិត្តចូលរួមលើកតម្កើងល្បែងប្រជាប្រិយខ្មែរក្នុងព្រឹត្តិការណ៍អង្គរសង្ក្រាន្ត ២០១៣
សំ ច័ន្ទម៉ាលីនី
សៀមរាប៖ យុវជនរាប់រយនាក់បានស្ម័គ្រចិត្តចូលរួមលេងល្បែងប្រជាប្រិយនៅក្នុងព្រឹត្តិការណ៍អង្គរសង្រ្កាន្តដែលនឹងប្រព្រឹត្តទៅនៅក្នុងពិធីបុណ្យចូលឆ្នាំប្រពៃណីខ្មែរនាថ្ងៃទី ១៤-១៦ មេសា ២០១៣ ខាងមុខនេះ។
ការលេងល្បែងប្រជាប្រិយនេះគឺជាផ្មែកមួយនៃការរៀបចំពិធីអង្គរសង្រ្កាន្តរបស់សហភាពសហព័ន្ធយុវជនកម្ពុជា (ស.ស.យ.ក) ដើម្បីចូលរួមអបអរសាទរពិធីបុណ្យចូលឆ្នាំថ្មីប្រពៃណីខ្មែរ។ នៅក្នុងការសម្តែងល្បែងប្រជាប្រិយនោះ មានយុវជនស្ម័គ្រចិត្តមកពីរាជធានីភ្នំពេញចំនួន១៤០នាក់ ខេត្តតាកែវចំនួន ១២០នាក់ និងខេត្តសៀមរាបចំនួន២៦០នាក់។ យុវជនទាំងនោះបានហ្វឹកហាត់សាកល្បងដោយមានទឹកចិត្ត សប្បាយរីករាយប្រកបដោយមោទនភាព។
កញ្ញា សុថា សុវណ្ណារដ្ឋ យុវតីស្ម័គ្រចិត្តខាងផ្នែកល្បែងប្រជាប្រិយមកពីខេត្តសៀមរាប បាននិយាយថា ការបង្ហាញល្បែងប្រជាប្រិយខ្មែរពិតជាអំពីសារៈសំខាន់ណាស់នៅក្នុងពិធីនេះ ដោយកញ្ញាបញ្ជាក់ថា “សំខាន់យើងចង់បង្ហាញវប្បធម៌ដ៏ខ្ពង់ខ្ពស់របស់ខ្មែរយើងឲ្យបរទេសបានយល់ដឹងថា ខ្មែរគឺអស្ចារ្យនិងល្បីខ្ទរខ្ទារដូចគេនិយាយមែន”។
លោក មាស សារ៉ាត់ យុវជនមកពីខេត្តតាកែវបាននិយាយថា យុវជនដែលស្ម័គ្រចិត្តចូលរួមលេងល្បែងប្រជាប្រិយនេះបានហ្វឹកហាត់ក្នុងរយៈពេលបីថ្ងៃ ដោយរយៈពេលនេះ ពួកគេបានស្គាល់គ្នា និងរួមគ្នារកវិធីសាស្រ្តដើម្បីទាក់ទាញភ្ញៀវទេសចរនៅក្នុងព្រឹត្តិការណ៍អង្គរសង្រ្កាន្តខាងមុខនេះ។
លោក សុខ សប្បាយណា អ្នកសម្របសម្រួលល្បែងប្រជាប្រិយរបស់ក្រុមយុវជនស្ម័គ្រចិត្តក៏បានបញ្ជាក់ពីសារៈសំខាន់នៃការបង្ហាញល្បែងប្រជាប្រិយខ្មែរនៅក្នុងព្រឹត្តិការណ៍ អង្គរសង្ក្រាន្តនេះ ដោយលោកលើកឡើងថា យុវជនបានយល់ដឹងកាន់តែច្រើនឡើងពីតម្លៃវប្បធម៌ដ៏រុងរឿងរបស់បុព្វបុរសរបស់ខ្លួន ហើយពួកគេរិតតែស្រលាញ់ ការពារ និងផ្សព្វផ្សាយឲ្យបានកាន់តែទូលំទូលាយ។
លោក សប្បាយណា បានបន្តថា ការលេងល្បែងប្រជាប្រិយនេះនឹងប្រព្រឹត្តិទៅនៅទីលានខាងមុខប្រាសាទអង្គរវត្ត និងនៅជុំវិញត្រពាំងសេស និងមួយចំនួនទៀតនៅមុខទីលានជល់ដំរី។
គួរបញ្ជាក់ដែរថា ស.ស.យ.ក បានរៀបចំព្រឹត្តិការណ៍អង្គរសង្រ្កាន្តក្នុងគោលបំណងបីធំៗគឺទី១ ជំរុញឲ្យមានការចូលរួមរបស់យុវជនឲ្យបានផុសផុល ក្នុងឱកាសអបអរសាទរពិធីចូលឆ្នាំថ្មីប្រពៃណីជាតិខ្មែរ។ ទីពីរប្រមូលផ្តុំមហាជនក្នុងទ្រង់ទ្រាយធំ ដើម្បីចូលរួមផ្សព្វផ្សាយអំពីវប្បធម៌ អរិយធម៌ខ្មែរ ដែលធ្លាប់រុងរឿងនាសម័យមហានគរដល់ភ្ញៀវទេសចរណ៍ជាតិ និងអន្តរជាតិ និងទីបីផ្តល់ឱកាសដល់យុវជនជំនាន់ក្រោយឲ្យមានមោទនភាពក្នុងការលើកយកមកបង្ហាញនូវវប្បធម៌ អរិយធម៌ ប្រពៃណីខ្មែរ ដូចជា ល្បែងប្រជាប្រិយ របាំប្រពៃណី និងពិធីសាសនាដែលធ្លាប់បានប្រតិបត្តិពីជំនាន់មួយទៅជំនាន់មួយ និងជារួម គឺដើម្បីចូលរួមទាក់ទាញ និងបង្កើនភ្ញៀវទេសចរណ៍ឲ្យមកទស្សនា និងកម្សាន្តនៅក្នុងប្រទេសកម្ពុជា ក៏ដូចជាប្រាសាទអង្គរវត្ត៕
