ស្រវឹងស្រាបើករថយន្តបុករបាំងថ្មចែកទ្រូងផ្លូវបាក់អស់ ១១ផ្ទាំង
ភ្នំពេញ៖ កាលពីវេលាម៉ោង ១០យប់ ថ្ងៃទី១១ ខែមីនា បុរសម្នាក់សង្ស័យស្រវឹងស្រា បានបើករថយន្តបុករនាំង ថ្មចែកទ្រូងផ្លូវ ស្ថិតនៅតាមបណ្ដោយផ្លូវសហព័ន្ធ រុស្ស៊ី ស្ថិតក្នុងភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ បាក់រាបដល់ដីអស់ចំនួន១១ផ្ទាំង ហើយបានព្យាយាមបើករត់គេចខ្លួនទាំងរថយន្តបែកកង់ខាងមុខ តែត្រូវសមត្ថកិច្ចតាមឃាត់ចាប់បាន ទាំងរថយន្តនិងអ្នកបើកបរ។
រថយន្តបង្កហេតុម៉ាក Accord ពណ៌សំបកឪឡឹក ពាក់ស្លាកលេខ ភ្នំពេញ 2T-7114 បើកបរដោយបុរសម្នាក់ ឈ្មោះឈឹម វុត្ថា អាយុ៤៦ឆ្នាំ រស់នៅភូមិស្លែងរលើង សង្កាត់ទឹកថ្លា ខណ្ឌសែនសុខ។
មុនពេលកើតហេតុគេឃើញរថយន្តខាងលើបើកបរក្នុង ទិសដៅពីកើតទៅលិចក្នុងល្បឿនលឿន ហើយគេសង្ស័យស្រវឹងស្រា ក៏បុករះរបាំងថ្មចែកទ្រូងផ្លូវអស់១១ផ្ទាំងបណ្តាលឲ្យរថយន្ត បែកកង់មុខផ្នែកខាងឆ្វេង ហើយបាន ព្យាយាមបើករត់គេចប្រមាណជា១គីឡូម៉ែត្រក៏ត្រូវសម្ថកិច្ច ស្ទាក់ចាប់ ឃាត់បានទាំងរថយន្ត និងអ្នកបើកបរតែម្ដង។
បច្ចុប្បន្នរថយន្តនិងអ្នកបើកបរ បង្កត្រូវបានសមត្ថកិច្ចយកទៅកាន់ការិយាល័យចរាចរណ៍ជើងគោកនៃ ស្នងការដ្ឋាន នគរបាលចរាចររាជធានីភ្នំពេញរង់ចាំដោះស្រាយតាមផ្លូវច្បាប់៕ ហេង នាង
