សម្ដេចតេជោ ហ៊ុន សែន អញ្ជើញប្រគល់សញ្ញាប័ត្រ ដល់និស្សិតជ័យលាភី ថ្នាក់បរិបញ្ញាប័ត្រ និងបញ្ញាប័ត្រជាន់ខ្ពស់
សារព័ត៌មាន Cambodia News/
ភ្នំពេញ ( ១៣ មិថុនា ២០១៦) ៖ នៅព្រឹកថ្ងៃទី១៣ខែមិថុនានេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីខ្ពង់ខ្ពស់ ក្នុងពិធីប្រគល់សញ្ញាប័ត្រ ដល់និស្សិតជ័យលាភី ថ្នាក់បរិបញ្ញាប័ត្រ និងបញ្ញាប័ត្រជាន់ខ្ពស់ចំនួន ៣.៧៤៦នាក់ និងប្រកាស ដាក់ឱ្យប្រើប្រាស់ជាផ្លូវការមជ្ឈមណ្ឌលកម្ពុជាដើម្បីស្រាវជ្រាវផ្លូវសូត្រសមុទ្រ របស់សាកលវិទ្យាល័យភូមិន្ទភ្នំពេញ នៅមជ្ឈមណ្ឌលសន្និបាត និងពិព័រណ៌កោះពេជ្រ។
យោងរបាយការណ៍រដ្ឋមន្ត្រីអប់រំ យុវជន និងកីឡា ឯកឧត្ដម ហង់ ជួនណារ៉ុន បាន បង្ហាញថា ៖ វិស័យអប់រំ ជាវិស័យអាទិភាពមួយ ក្នុងចំណោមវិស័យអាទិភាពធំៗជាច្រើន ក្នុងការកសាងធនធានមនុស្សប្រកបដោយសមត្ថភាព ប្រជែងឈ្នះ នៅលើគ្រប់កាលៈទេសៈ និងគ្រប់ការដ្ឋានកំណែទម្រង់ ដើម្បីបម្រើឱ្យតម្រូវការ ការអភិវឌ្ឍសេដ្ឋកិច្ចសង្គមកម្ពុជា និងក្នុង ដំណាក់កាល នៃសមាហរណកម្ម អាស៊ាន និងពិភពលោក។
ឯកឧត្ដម បន្តថា ដោយមើលឃើញពីសារៈសំខាន់នៃវិថីសូត្រសមុទ្រ នាសតវត្សរិ៍ទី២១ ទើបដេប៉ាតឺម៉ង់សិក្សាអន្តរជាតិ នៃសាកលវិទ្យាល័យភូមិន្ទភ្នំពេញ បានបង្កើតមជ្ឈមណ្ឌលនេះឡើងក្នុងគោលបំណង លើកកម្ពស់ការសិក្សាស្រាវជ្រាវរបស់និស្សិត និងអ្នកស្រាវជ្រាវ ខ្មែរយើង លើវិថីសូត្រសមុទ្រនេះ ឱ្យកាន់តែស៊ីជម្រៅឡើងថែមទៀត៕
