ខ្មាន់កាំភ្លើងជាស្រីជិះរថយន្តដេញបាញ់យុវជន ២នាក់រងរបួសធ្ងន់
ភ្នំពេញ៖ កាលពីវេលា ម៉ោងប្រហែល ១១យប់ថ្ងៃទី១៦ ខែមករា នារី រួមនិងមិត្តភក្តិរបស់ខ្លួនមួយក្រុម ហើយមានមនុស្សប្រុស ដែលសង្ស័យជា ក្រុមអង្គរក្ស ជិះម៉ូតូចំនួន២គ្រឿង តាមបិទគូទពីក្រោយ បានបាញ់ប្រហារទៅលើយុវជន ពីរនាក់ បណ្តាលឲ្យ ត្រូវគ្រាប់ម្នាក់ និងម្នាក់ទៀត បាក់ជើងនៅពេលដែល ម៉ូតូរបស់ពួកគេ ទៅបុករថយន្តចតចោល ស្ថិតនៅតាម ផ្លូវលេខ ៣៦០ កែងផ្លូវលេខ៩៥ សង្កាត់បឹងកេងកងទី៣ ខណ្ឌចំការមន។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ ជនរងគ្រោះទាំងពីរនាក់ បានជិះម៉ូតូម៉ាក Viva ពណ៌ខ្មៅ មួយគ្រឿង ពាក់ស្លាកលេខ ភ្នំពេញ 1Y-5359 ពេលចេញពីក្លឹបកំសាន្ត ខាងលើ លុះមកដល់ ចំណុតកើតហេតុ ស្រាប់តែជួបនិងរថយន្តឡង់គ្រីស័រ ពណ៌ស្ក មិនចាំស្លាកលេខ បើក និងជិះដោយ នារីមួយក្រុម អមដោយមនុស្សប្រុសចំនួន២ម៉ូតូ តាមពីក្រោយ ធើ្វការបាញ់ប្រហារ ទៅលើជនរងគ្រោះ បណ្តាលឲ្យជនរងគ្រោះ មានឈ្មោះ ចែម ធារ៉ា អាយុ២១ឆ្នាំ ស្នាក់នៅក្នុងវត្តសារាវ័ន្តតេជោ កុដិលេខ៤០ មុខរបរជានិស្សិត ត្រូវចំភ្លៅខាងស្តាំមួយគ្រាប់ ។
ក្រោយពេលបាញ់ប្រហាររួច ម៉ូតូរបស់ជនរងគ្រោះ បានជ្រុលទៅបុក រថយន្តមួយគ្រឿង ដែលចតនៅតាមផ្លូវ បានបណ្តាលឲ្យដួល ហើយធ្វើឲ្យជនរងគ្រោះម្នាក់ទៀត មានឈ្មោះ ផន ផានូ អាយុ ២៧ឆ្នាំ ស្នាក់នៅម្តុំកំបូល ដួលបាក់ជើងស្តាំតែម្តង។
ក្រោយកើតហេតុ ភ្លាមៗ គេបានឃើញ សមត្ថកិច្ច ដេញពីក្រោយរថយន្ត របស់ខ្មាន់កាំភ្លើង ជានារី ប៉ុន្តែមិនអាចចាប់ បាននោះឡើយ បច្ចប្បន្ន សមត្ថកិច្ច បាននិងកំពុងធ្វើ ការស្រាវជ្រាវ លើករណីនេះ ៕
ដោយ៖ ហេង នាង
