លោក ហ៊ុន សែន៖ បើពុំមានថ្ងៃ៧មករា ទេយើងក៏គ្មានថ្ងៃនេះដែរ
ប៉ៃលិន៖ ថ្លែងនៅក្នុងពិធីសម្ពោធសមិទ្ធផលនានា ក្នុងខេត្តប៉ៃលិន នៅព្រឹកថ្ងៃទី៣ មករា ២០១៣នេះ លោក ហ៊ុន សែន នាយករដ្ឋមន្រ្តីប្រទេសកម្ពុជា បានមានប្រសាសន៍ថា ប្រសិនបើពុំមានថ្ងៃ៧ មករាទេក៏ពុំមានកិច្ចព្រមព្រៀង សន្តិភាពទីក្រុងប៉ារី ហើយក៏ពុំមាន អ្វីៗសព្វគ្រប់រហូតមកដល់សព្វថ្ងៃនេះដែរ។
លោក នាយករដ្ឋមន្រ្តីបន្តថា បើពុំមានថ្ងៃ៧មករា ទេ យើងក៏គ្មានថ្ងៃនេះដែរ ងាប់មនុស្សអស់ទៅហើយមើលទៅ។ លោកបានបញ្ជាក់ថា “ខ្ញុំគិតថា យើងទាំងអស់គ្នា បានដឹងរៀងៗខ្លួនហើយ អ្វីដែលវាបានកើតឡើងនៅលើទឹកដីដ៏កំសត់របស់យើង ខ្ញុំបានមកប្រកាស ខ្ញុំមកទីនេះ ខ្ញុំសូមជម្រាប ខ្ញុំមកប៉ៃលិន ខ្ញុំមកសំឡូត សំពៅលូន កំរៀង ម៉ាឡៃ ម្តាយធំខ្ញុំ និងម្តាយខ្ញុំ បើកទ្វារសួរខ្ញុំថា «ហ្អែងទៅកន្លែងគេហ្នឹង អត់ខ្លាចគេបាញ់សម្លាប់ទេអី ហើយម្តាយធំ ថាក្មួយឯងទៅកន្លែងគេ មិនខ្លាចគេ សម្លាប់ទេអី។ ខ្ញុំប្រាប់ម្តាយខ្ញុំវិញថា ម៉ែ ធំ បើគេសម្លាប់គេសម្លាប់តែខ្ញុំនិងអ្នកទៅជាមួយខ្ញុំតែប៉ុន្មាននាក់ទេ ប៉ុន្តែបានមកវិញ គឺបានផែនដីមកវិញតែម្តង ខ្មែរលែងច្បាំង គ្នាហើយ នេះគឺជាការប្រថុយជីវិត»។
លោកបានបន្តទៀតថា នៅថ្ងៃទី២០ ខែមិថុនា ឆ្នាំ១៩៧៧ ចាប់ផ្តើមយកជីវិតធ្វើជាដើមទុន ដើម្បីរំដោះប្រទេសជាតិ ចេញពីរបប ប៉ុល ពត ហើយនៅពេលដែល អនុវត្តនយោបាយឈ្នះ ឈ្នះ បើសម្តេចមិនត្រឡប់មកទេ តើបងប្អូនអាចជឿបានទេ ថ្វីត្បិតតែមាននាយករដ្ឋមន្រ្តី២ ប៉ុន្តែអ្នកដែលធ្វើឲ្យបងប្អូនជឿទុកចិត្ត គឺ ហ៊ុន សែន រឿងនេះគឺជារឿងមិនសាមញ្ញ មិនធម្មតាទេ៕
