ក្រសួងមហាផ្ទៃនឹងចាត់វិធានការចំពោះការញុះញង់ ជេរប្រមាថ តាមអ៊ិនធើណែត
សារព័ត៌មាន Cambodia News/
ភ្នំពេញ (០៨ កញ្ញា ២០១៥) ៖ យោងតាមអនុក្រឹត្យស្តីពីការរៀបចំនិងការប្រព្រឹត្តទៅនៃក្រសួងមហាផ្ទៃចុះថ្ងៃទី១៩ខែសីហា ឆ្នាំ២០១៥ ឲ្យដឹងថានាយកដ្ឋានប្រឆាំងបទល្មើសបច្ចេកវិទ្យាដែលជាសេនាធិការនៃក្រសួងមហាផ្ទៃនឹងសិក្សារៀបចំគោលការណ៍ វិធានការ យុទ្ធសាស្រ្តនិងផែនការសកម្មភាពលើការបង្ការ ទប់ស្កាត់ ស្រាវជ្រាវ ស៊ើបអង្កេតនិងបង្រ្កាបបទល្មើសបច្ចេកវិទ្យា។
បើតាមអនុក្រឹត្យនេះ នាយកដ្ឋានប្រឆាំងបទល្មើសបច្ចេកវិទ្យានឹង”ស៊ើបអង្កេត និងចាត់វិធានការតាមច្បាប់ចំពោះសកម្មភាពញុះញង់ ជេរប្រមាថ រើសអើងពូជសាសន៍ បង្កចលាចលក្នុងសង្គម តាមប្រព័ន្ធអ៊ិនធើណែត”។
ទាក់ទងនឹងសេចក្តីព្រាងច្បាប់ឧក្រិដ្ឋកម្មតាមបច្ចេកវិទ្យាគមនាគមន៍ និងព័ត៌មាន ក្រសួងប្រៃសណីយ៍និងទូរគមនាគមន៍ឲ្យដឹងថាសេចក្តីព្រាងច្បាប់នេះបានដាក់បញ្ចូលចំណុចនៃការជេរប្រមាថ ដើម្បីធានាប្រយោជន៍អ្នកប្រើប្រាស់។ ក្រសួងបន្តថាសេចក្តីព្រាងច្បប់នេះទុកមួយអន្លើសិន ដោយសាររាជរដ្ឋាភិបាលជាប់ដោះស្រាយការងារនានាដែលមានលក្ខណៈបន្ទាន់និងអាទិភាពជាង។
ក្រសួងប្រៃសណីយ៍បន្តថាច្បាប់នេះមានបំណងកំណត់វិធានការអប់រំ បង្ការទប់ស្កាត់ និងបង្រ្កាបការប្រព្រឹត្តបទល្មើសនានាតាមប្រព័ន្ធបច្ចេកវិទ្យាគមនាគមន៍ និងព័ត៌មាន ដើម្បីធានាការអនុវត្តច្បាប់ ប្រយុទ្ធប្រឆាំងនិងបង្រ្កាបបទល្មើសតាមប្រព័ន្ធបច្ចេកវិទ្យាគមនាគមន៍ និងព័ត៌មាន ក៏ដូចជាសុវត្ថិភាព និងការពារផលប្រយោជន៍ស្របច្បាប់ក្នុងការប្រើប្រាស់ និងអភិវឌ្ឍបច្ចេកវិទ្យាគមនាគមន៍ និងព័ត៌មាន៕
