តុលាការសម្រេចផ្តន្ទាទោស ឈូក បណ្ឌិត ដាក់ពន្ធនាគារ ១ឆ្នាំកន្លះ
Cambodia News
ស្វាយរៀង៖ នាព្រឹកថ្ងៃទី២៥ ខែមិថុនា នេះ តុលាការ សាលាដំបូងខេត្តស្វាយរៀង បានប្រកាសសេចក្តីសម្រេចលើសំណុំរឿងក្តីបាញ់ស្ត្រីកម្មករ ៣ នាក់ ឲ្យរងរបួស ដោយសម្រេចផ្តន្ទាទោស ដាក់ពន្ធនាគាររយៈពេល ១ ឆ្នាំ និង ៦ ខែ លើលោក ឈូក បណ្ឌិត អតីតអភិបាលក្រុងបាវិត ខេត្តស្វាយរៀង។
សំណុំរឿងក្តីនេះ មានជនជាប់ចោទ ២ នាក់ គឺលោក ឈូក បណ្ឌិត អតីតអភិបាលក្រុងបាវិត និងលោក ស ចន្ថា ប៉ូលិសក្រុងបាវិត។ ចំណែកសាក្សី មានចំនួន ២០ នាក់។ សេចក្តីសម្រេចរបស់តុលាការនៅព្រឹកមិញ ក៏បានផ្តន្ទាទោស ដាក់ពន្ធនាគារ លើប៉ូលិសឈ្មោះ ស ចន្ថា ដាក់ពន្ធនាគារ ៦ ខែ ពីបទកាន់អាវុធខុសច្បាប់។
សូមរម្លឹកថា ក្នុងសវនាការ មានសាក្សីជាច្រើននាក់ បានប្រាប់តុលាការខេត្តស្វាយរៀង ថា អតីតអភិបាលក្រុងបាវិត លោក ឈូក បណ្ឌិត បានកាន់កាំភ្លើង បាញ់លើកម្មករកាត់ដេរ នៅក្នុងព្រឹត្តការណ៍កម្មករតវ៉ា នៅរោងចក្រ កៅវ៉េ កាលពីថ្ងៃទី២០ ខែកុម្ភៈ ឆ្នាំ២០១២។
ប៉ុន្តែក្នុងសវនាការ លោក ឈូក បណ្ឌិត និងមេធាវី មិនបានចូលរួមទេ។ ចំណែកលោក ស ចន្ថា បានបដិសេធការចោទប្រកាន់ ហើយក៏មានសាក្សីជាច្រើននាក់ បានអះអាងថា ប៉ូលិស លោក ស ចន្ថា មិនពាក់ព័ន្ធរឿងបាញ់ស្ត្រីកម្មករ ៣ នាក់ នោះឡើយ៕