ជារៀងរាល់ឆ្នាំប្រជាជនជិតមួយម៉ឺននាក់ស្លាប់ដោយសារជំងឺរបេង
យោងតាមមន្ត្រីសុខភាពនៃអង្គការអន្តរជាតិមួយដែលធ្វើសកម្មភាពលើវិស័យ សុខភាពបានអះអាងថា ជារៀងរាល់ឆ្នាំប្រជាជនកម្ពុជាចំនួន៩.០០០នាក់ បានស្លាប់ដោយសារជំងឺរបេង។ ហើយកម្ពុជាក៏ជាប្រទេសមួយស្ថិតក្នុងចំណោម ប្រទេសចំនួន២២លើពិភពលោកដែលមានជំងឺរបេងធ្ងន់ធ្ងរជាងគេ។
លោកស្រីវេជ្ជបណ្ឌិតម៉ូនីក មូសូហ្វ( Monique Mosoft) ប្រធានការិយាល័យសុខភាព សាធារណៈនៃទីភ្នាក់ងារសហរដ្ឋអាមេរិក សម្រាប់ កិច្ចអភិវឌ្ឍន៍អន្តរជាតិ(USAID)ប្រចាំកម្ពុជាបាននិយាយកាលពីចុង មីនាកន្លងមកថា ទោះជាយ៉ាងណាកម្ពុជាកំពុងខិតខំក្នុងការកាត់បន្ថយអត្រាប្រេវ៉ាទ្បង់បានពាក់កណ្តាល ក្នុងដំណើរឆ្ពោះទៅសម្រេចគោលដៅអភិវឌ្ឍន៍សហសវត្សរ៍នៅឆ្នាំ២០១៥។
រដ្ឋលេខាធិការក្រសួងសុខាភិបាល លោក អេង ហួត បាននិយាយថា កម្មវិធីជាតិកំចាត់រោគរបេងត្រូវខិតខំធ្វើយ៉ាងណា ស្រាវជ្រាវករណីជំងឺរេបងគ្រប់សណ្ឋានឲ្យបាន៤០.០០០ករណី និងអត្រាព្យាបាលជាសះស្បើយលើសពី៨៥ភាគរយ។លោកបន្តថា ការងារស្រាវជ្រាវជំងឺរបេងលើកុមារ មនុស្សចាស់ និងការស្រាវជ្រាវតាមពន្ធនាគារគួរត្រូវពង្រីក។
ជារៀងរាល់ឆ្នាំក្នុងពិភពលោកមានមនុស្សប្រមាណ៩លាន នាក់ឆ្លងជំងឺរបេងក្នុងនោះ១,៥លាននាក់បានស្លាប់ដោយសារជំងឺរបេង។ ដោយឡែកនៅកម្ពុជាមានមនុស្សប្រមាណ៦២.០០០នាក់បានឆ្លងជំងឺរបេង និងស្លាប់ដោយសារជំងឺនេះ៩.០០០នាក់ជារៀងរាល់ឆ្នាំ៕
