អាជ្ញាធររឹតបន្តឹងសន្តិសុខ ខណៈពេលតុលាការ បន្តសវនាការលើបាតុករ ២១ នាក់
សារព័ត៌មាន Cambodia News/
ភ្នំពេញ (០៦ មេសា ២០១៤) ៖ នៅព្រឹកថ្ងៃទី០៦ ខែឧសភា នេះ សាលាដំបូងរាជធានីភ្នំពេញ បានបន្តបើកសវនាការជំនុំជម្រះក្តី លើក្រុមសកម្មជនអ្នកតវ៉ាទាំង២១នាក់ រួមទាំងលោក វ៉ន ពៅ ប្រធានសមាគមប្រជា ធិបតេយ្យ នៃសេដ្ឋកិច្ចក្រៅប្រព័ន្ធ។
សវនាការនាព្រឹក នេះ នៅជុំវិញបរិវេណសាលាដំបូង ត្រូវបានគេដាក់ពង្រាយកម្លាំងសមត្ថកិច្ច ដាក់រណាំងរបង រួមទាំងត្រៀមរថយន្តពន្លត់អគ្គិភ័យផងដែរ បង្កាក្លាចក្រែងមានការអុកឡុករំខានពីក្រុមអ្នកតវ៉ា។
ការ រឹតបន្តឹងសន្តិសុខធ្វើឡើង ក្នុងពេលតុលាការ បន្តបើកសវនាការកាត់ក្តី លើបាតុករ ២១ នាក់នេះមានក្រុមអ្នកតវ៉ារាប់រយនាក់ បានប្រមូល ស្រែកមេក្រូ នៅខាងក្រៅរបាំងដែក ហើយក៏មានប៉ូលិសបង្ក្រាបបាតុកម្ម រួមទាំងកងសន្តិសុខ ជាច្រើននាក់ ត្រូវបានដាក់ពង្រាយ ដើម្បីការពារសន្តិសុខផងដែរ ប៉ុន្តែមកដល់ពេលនេះ មិនមានហិង្សាណាមួយ កើតឡើងនោះទេ។
សូមបញ្ជាក់ថា ក្រុមអ្នកតវ៉ាទាំង២១នាក់ ត្រូវសាលាដំបូងរាជធានីភ្នំពេញ សម្រេចឃុំខ្លួនជាបណ្តោះអាសន្ននៅ មណ្ឌលកែប្រែត្រពាំងផ្លុងក្រោយការផ្ទុះអំពើហិង្សាជាមួយ សមត្ថកិច្ចនៅតំបន់សេដ្ឋកិច្ចពិសេសភ្នំពេញ និងលើផ្លូវ វ៉េងស្រេងកាលពីថ្ងៃទី២-៣ ខែមករា ឆ្នាំ២០១៤ ដែលបង្កឲ្យមានអ្នកស្លាប់ និងរងរបួសជាច្រើននាក់៕
