ខឹងស្តីដណ្តឹងកូនស្រីមិនបានទៅកាប់ឪពុកម្តាយគដល់លើផ្ទះ
សារព័ត៌មាន Cambodia News/
កណ្តាល (២៤ មេសា ២០១៧) ៖ ខឹងចូលស្តីដណ្តឹងកូនស្រីមិនបាន បែកគំនិតយកដាវកាប់សម្លាប់ឪពុកម្តាយខាងស្រីបណ្តាលអោយស្លាប់ឪពុក និងម្តាយរងរបួសធ្ងន់ បង្ករអោយមានការភ្ញាក់ផ្អើលកាលពីវេលាម៉ោង១រំលងអាធ្រាតឈានចូលថ្ងៃទី២៤ ខែមេសា ឆ្នាំ២០១៧ នៅក្នុងផ្ទះជនរងគ្រោះស្ថិតក្នុងភូមិភូមិរកា ឃុំរកា ស្រុកកណ្តាលស្ទឹង ខេត្តកណ្តាល។
តាមប្រភពព័ត៌មានពីមន្ត្រីអាវុធហត្ថស្រុកកណ្តាលស្ទឹងបានអោយដឹងថា មូលហេតុដែលបណ្តាលអោយជនល្មើសឈានដល់ការកាប់សម្លាប់ជនរងគ្រោះដោយសារជនល្មើសបានចូលស្តីដណ្តឹងកូនស្រីរបស់ជនរងគ្រោះ តែជនរងគ្រោះមិនព្រមដោយសារជនល្មើសមានប្រពន្ធរួចទៅ លុះដល់ថ្ងៃកើតហេតុ ខណៈពេលជនរងគ្រោះជាឪពុកឈ្មោះ ឡូញ លុន អាយុ៦២ឆ្នាំ កំពុងដេកលង់លក់លើអង្រឹង ស្រាប់តែជនល្មើសបានឡើងទៅកាប់ដល់លើផ្ទះចំនួន៤ដាវ បណ្តាលអោយ រយះក្បាល ធ្លាយពោះវៀន ដើមទ្រូង និងកដៃ បណ្តាលអោយស្លាប់ភ្លាមៗយ៉ាងអាណោចអាធ័មបំផុត ចំណែកជនរងគ្រោះជាម្តាយឈ្មោះ វ័រ រ៉ៃ អាយុ៦០ឆ្នាំ ដែលកំពុងដេកលើគ្រែក្បែរគ្នាត្រូវជនល្មើសកាប់ត្រូវ២ដាវរងរបួសធ្ងន់ធ្ងរ។
ក្រោយធ្វើសកម្មភាពរួច ជនល្មើសបានព្យាយាមរត់គេចខ្លួនតែត្រូវប្រជាពលរដ្ឋព័ទ្ធចាប់ និងព្រួតគ្នាវាយផង កាប់ផងបណ្តាលអោយស្លាប់នៅកន្លែងកើតហេតុតែម្តង។ ជនល្មើសចិត្តព្រៃផ្សៃខាងលើមានឈ្មោះសួន ឧត្តរា អាយុ៣៥ឆ្នាំ មានស្រុកកំណើតនៅឃុំដីឥដ្ឋ ស្រុកកៀនស្វាយ ខេត្តកណ្តាល បច្ចុប្បន្នរស់នៅផ្ទះលេខ៤៨ ផ្លូវលំ ភូមិទ្រា សង្កាត់ស្ទឹងមានជ័យ ខណ្ឌមានជ័យ៕
