បុរសស្រឡាញ់ភេទដូចគ្នា តូចចិត្តគ្រួសារតាមបំបែក ធ្វើអត្តឃាត តែមិនបានសម្រេច
ភ្នំពេញ ៖ បុរសស្រឡាញ់ភេទដូចគ្នា ម្នាក់តាំងខ្លួនជាប្តី និងម្នាក់ទៀតតាំងខ្លួនជាប្រពន្ធ បានស្រឡាញ់និងរស់នៅជាមួយគ្នាជាប្តីប្រពន្ធក្នុងផ្ទះជួលរយៈពេល ២ឆ្នាំកន្លងមកហើយ ខណៈពេលដែលក្រុមគ្រួសារព្យាយាមតាមបំបែកពួកគេ។
ការតាមបំបែកនេះ កាលពី វេលាម៉ោង៩ និង៥០នាទីព្រឹកថ្ងៃទី១៥ តុលា ២០១៣ នៅចំណុចផ្ទះជួលមួយកន្លែង ស្ថិតក្នុងភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ ធ្វើឱ្យបុរសម្នាក់ដែលតាំងខ្លួនជាប្តីរត់ទៅចង.កសម្លាប់ខ្លួន តែមិនបានសម្រេច ដោយសារតែម្ចាស់ផ្ទះជួលជួយទាន់ ។
ប្រភពបានឱ្យដឹងថា បុរសដែលតាំងជាប្តីឈ្មោះកែម ពៅ អាយុ២៤ឆ្នាំ មានស្រុកកំណើតនៅភូមិកំពង់ហ្លួង ឃុំកំពង់ហ្លួង ស្រុកពញាឮ ខេត្តកណ្តាល ។ ចំណែកម្នាក់ទៀតដែលតាំងខ្លួនជាប្រពន្ធឈ្មោះខាន់ ស្រស់ អាយុ២៤ឆ្នាំដូចគ្នា មានស្រុកកំណើតនៅភូមិប្រស្រែ ឃុំសំឡាយ ស្រុកអង្គរជុំ ខេត្តកំពត ។
នៅមុនពេលកើតហេតុ ពួកគេមានទំនាស់នឹងគ្នានៅក្នុងបន្ទប់ស្នាក់ ដែលការឈ្លោះគ្នានេះ បណ្តាលមកពីរឿងក្រុមគ្រួសារតាមបំបែកនេះឯង ហើយនៅថ្ងៃកើតហេតុ ប្អូនប្រុសជីដូនមួយរបស់ឈ្មោះកែម ពៅ ជាប្តី បានទៅតាមឱ្យគេត្រឡប់ទៅសុ្រកកំណើតវិញ ប៉ុន្តែខណៈនោះឈ្មោះស្រស់ ដែលតាំងខ្លួនជាប្រពន្ធមិនព្រម និងបាននិយាយថា បើចង់យកកែម ពៅ ត្រឡប់ទៅស្រុកវិញ ត្រូវតែសួររូបគេសិន ព្រោះគេ គឺជាប្រពន្ធ ចំណែកឯឈ្មោះកែម ពៅ ក៏មិនចង់បែកពីប្រពន្ធដែរ៕ Cambodia News