អ្នកកាសែតជាង ១០នាក់ត្រូវក្មេងទំនើងព្រួតវាយបណ្តាលឲ្យរបួស
Cambodia News
ភ្នំពេញ៖ កាលពីវេលាម៉ោង១២និង៣០នាទីរំលងអាធ្រាត្រឈានចូល ថ្ងៃទី១៩ ខែមិនា ក្រុមអ្នកកាសែត ទាំងស្ថាប័នទូរទស្សន៍កាសែត និងគេហទំព័រប្រមាណជា១០នាក់ ត្រូវក្រុមក្មេងទំនើងបើករថយន្តប្រណាំងគ្នាតាមដងផ្លូវសាធារណៈព្រួត វាយបណ្តាលឲ្យរងរបួស និងខូចខាតរបស់ប្រើប្រាស់មួយចំនួន ខណៈពេលដែលពួកគេនាំគ្នាចុះទៅកន្លែងកើតហេតុ ដែលក្រុមក្មេងទំនើងបើករថយន្តបុកគ្នា នៅតាមបណ្តោយផ្លូវព្រះមុនីវង្ស ដើម្បីផ្តិតយកព័ត៌មានមកចុះផ្សាយ។
តាមប្រភពពត៌មាន មុនពេលកើតហេតុ ក្រុមក្មេងស្ទាវមួយក្រុម បានជិះរថយន្តស៊េរីទំនើប ៣គ្រឿង ទី១ ម៉ាក CRV ពណ៌ទឹកប្រាក់ ទី២ម៉ាកមីនី ពណ៌ក្រហម និងមួយគ្រឿងទៀតមិនស្គាល់ម៉ាក បានជិះ ប្រដេញគ្នាតាមបណ្តោយផ្លូវព្រះមុនីវង្ស ក្នុងទិសដៅពីជើងទៅត្បូង លុះដល់ចំណុចផ្លូវភ្លោះអូឬស្សី រថយន្តទាំងពីរគ្រឿងដែលស្គាល់ម៉ាកខាងលើនេះ ប៉ះគ្នា បណ្តាលឲ្យខ្ទាតទៅផ្ទប់នឹងរបងការដ្ឋានសំណង់ និងបង្គោលភ្លើង។
ឃើញដូចនោះអ្នកកាសែតជាច្រើននាក់ ទាំងស្ថាប័នទូរទស្សន៍និងកាសែត បាននាំគ្នាចុះទៅថតរូបដើម្បីផ្តិតយករូបភាពមកចុះផ្សាយ តែបែរជាត្រូវក្រុមក្មេងទំនើងទាំងអស់នេះ ព្រួតគ្នាវាយអ្នកកាសែតបណ្តាលឲ្យរបួសជាង១០នាក់ ហើយអ្នកខ្លះខូចខាតរបស់របរប្រើប្រាស់ដូចជាទូរស័ព្ទនិងម៉ាស៊ីនថតរូប ផងដែរ។
បន្ទាប់ពីកើតហេតុ សមត្ថកិច្ចនគរបាលប៉ុស្តិ៍បឹងរាំង បានចុះមកអន្តរាគមន៍ ឃាត់ខ្លួនក្រុមក្មេងទំនើងបានចំនួន២នាក់ យកទៅអធិការដ្ឋានខណ្ឌដូនពេញ ដើម្បីចាត់ការតាមច្បាប់៕ ហេង នាង
