ម៉ាឡេស៊ីកំពុងបារម្ភដោយមានប្រជាជនខ្លួនក្មេងៗកំពុងហ្វឹកហាត់ក្នុងជំរំក្រុមIS
សារព័ត៌មាន Cambodia News/
ម៉ាឡេស៊ី (១៣ មករា ២០១៦) ៖ មន្ដ្រីអាជ្ញាធរដែលជាក្រុមស៊ើបអង្កេតបាននិយាយថា មានក្មេងៗជនជាតិម៉ាឡេស៊ីចំនួន៨នាក់ត្រូវបានបង្ហាត់បង្រៀនឲ្យក្លាយជាអ្នកប្រយុទ្ធរបស់ក្រុមសកម្មប្រយុទ្ធរដ្ឋអ៊ីស្លាម។ នេះបើតាមប្រព័ន្ធផ្សព្វផ្សាយក្នុងស្រុករាយការណ៍កាលពីថ្ងៃទី១២មករា។
ការស៊ើបអង្កេតកំពុងតែបន្ដធ្វើទៀត ដើម្បីបញ្ជាក់ឲ្យច្បាស់ពីជំរំហ្វឹកហាត់ ដែលគេជឿជាក់ថាស្ថិតនៅក្នុងប្រទេសស៊ីរីនិងប្រទេសអ៊ីរ៉ាក់។ នេះបើតាមការបញ្ជាក់ពីប្រធានបណ្ដាញពិសេសធ្វើការលើបញ្ហានេះ ប្រាប់ដល់អ្នកកាសែតក្នុងពេលធ្វើសន្និសីទក្នុងទីក្រុងកូឡាឡាំពួរ។
សូមបញ្ជាក់ថា កាលពីខែមុនប៉ូលិសម៉ាឡេស៊ីបានព្រមានថា មានក្មេងៗអាយុប្រមាណជា២ឆ្នាំប៉ុណ្ណោះ ត្រូវគេបង្វឹកនៅក្រៅប្រទេសឲ្យក្លាយក្រុមភេរវករជំនាន់ក្រោយ។ វីដេអូបានបង្ហាញពីរូបភាពក្រុមក្មេងៗទទួលសម្ភារៈយោធា និងការបង្វឹកផ្នែកយោធា ព្រមទាំងបានស្បថបង្ហាញភក្ដីភាពចំពោះក្រុមរដ្ឋអ៊ីស្លាមនិងមេដឹកនាំរបស់ពួកគេផង។ ខណៈពេលនេះ មន្ដ្រីប្រឆាំងអំពើភេរវកម្មបានបង្ហាញក្ដីបារម្ភថា ជំរំហ្វឹកហាត់ក្មេងៗនេះអាចនឹងត្រូវបង្កើតឡើងក្នុងប្រទេសម៉ាឡេស៊ី៕
