លួចកាច់.កម៉ូតូគេម្ចាស់ឃើញទាន់វាយទ្រមខ្លួន
ភ្នំពេញ ៖ កាលពីវេលាម៉ោង២១ និង៣០នាទី ថ្ងៃទី៦ ខែមករា បុរសម្នាក់លួចកាច់.កយកម៉ូតូរបស់គេបានសម្រេច តែសំណាងអាក្រក់ត្រូវម្ចាស់ម៉ូតូឃើញទាន់ស្រែកចោរៗរហូតប្រជាពលរដ្ឋ ដេញស្ទាក់ចាប់បានវាយរហូតទ្រមខ្លួន ទើបប្រគល់ជូនប៉ូលិស ស្ថិតនៅចំណុចមុខហាងឡាក់គីហ្វាតផ្ទះលេខ៦៣Eoផ្លូវ លេខ១៧២ភូមិ៤សង្កាត់ជ័យជំនះខណ្ឌដូនពេញ។
ជនជាប់ចោទម្នាក់នេះត្រូវបានសមត្ថកិច្ចប៉ូលិសប្រាប់ឲ្យស្គាល់ឈ្មោះ សុន ដុំភេទប្រុសអាយុ៤៨ឆ្នាំមុខរបរមិនពិតប្រាកដស្នាក់នៅផ្ទះលេខ៥០ ផ្លូវ១១៥សង្កាត់បឹងត្របែកខណ្ឌចំការមន។
ជនជាប់ចោទម្នាក់នេះបានធ្វើសកម្មភាពលួចកាច់.កយកម៉ូតូម៉ាកសេ១០០ផលិតនៅប្រទេសកូរ៉េ១គ្រឿងពណ៌ស្លាទុំពាក់ស្លាកលេខកណ្ដាល1C-7918ដែល ជាកម្មសិទ្ធិរបស់ជនរងគ្រោះឈ្មោះសៅ វុត្ថាភេទប្រុស អាយុ៣៣ឆ្នាំមុខរបរជាបុគ្គលិកបំរើការងារនៅក្នុងហាងកើតហេតុខាងលើ ហើយម៉ូតូ១គ្រឿងនេះក៏ត្រូវបានប៉ូលិសប្រគល់ឲ្យម្ចាស់ដើមវិញ។
ប្រភព ព័ត៌មានបានឲ្យដឹងថានៅមុនពេលកើតហេតុជនរងគ្រោះបានជិះម៉ូតូ របស់ខ្លួនម៉ាកសេ១០០កូរ៉េនេះមកចតទុកនៅមុខហាងដែលខ្លួនធ្វើការខាង លើ ហើយបានដើរចូលទៅក្នុងហាងបាត់។ ដោយឡែកជនជាប់ចោទម្នាក់នេះឃើញឱកាសល្អក៏បានចូលទៅធ្វើសកម្មភាពកាច់ក យកម៉ូតូនោះបានសម្រេច។
ប៉ុន្តែសំណាងអាក្រក់ត្រូវជនរងគ្រោះឃើញទាន់ព្រមទាំងស្រែកចោរៗដេញ តាមពីក្រោយជាប់រហូតមានការភ្ញាក់ផ្អើលដល់ប្រជាពលរដ្ឋក្បែរនោះចេញ មកជួយស្ទាក់ចាប់បានវាយរហូតទ្រមខ្លួន ទើបប្រគល់ជូនប៉ូលិស បញ្ជូនមកអធិការដ្ឋាននគរបាលខណ្ឌដូនពេញដើម្បីចាត់ការ ទៅតាមច្បាប់៕
ដោយ៖ ហេង នាង
