ម៉ូតូពីរគ្រឿងបុកគ្នា របួសធ្ងន់ម្នាក់ស្រាលម្នាក់
ភ្នំពេញ ៖ កាលពីវេលាម៉ោង ១៥និង២០នាទីរសៀល ថ្ងៃទី២២ ធ្នូ២០១២ បុរសម្នាក់របួស ធ្ងន់ និងម្នាក់ទៀតរបួសស្រាល ខណៈពេលដែលពួកគេជិះម៉ូតូពីរគ្រឿងបុកគ្នា នៅចំណុច ផ្លូវ៤៣២ កែងផ្លូវ១៩៣ ក្នុងសង្កាត់ទួលទំពូងទី២ ខណ្ឌចំការមន។
សាក្សីដែលបានឃើញហេតុការណ៍គ្រោះថ្នាក់ចរាចរណ៍ខាងលើនេះ បានឲ្យដឹងថា មុនពេលកើតហេតុ គេឃើញយុវជនម្នាក់ជិះម៉ូតូមួយគ្រឿងមិនស្គាល់ម៉ាក បានបើកបរតាមបណ្តោយផ្លូវលេខ៤៣២ ពីកើតមកលិច លុះមកដល់ចំណុចផ្លូវកែងលេខ១៩៣ ក៏បានជ្រុលល្បឿនបុរសម្នាក់ដែលកំពុងជិះម៉ូតូសង់ការ៉េ ពណ៌ក្រហមពេញទំហឹងតែម្តង បណ្តាលឲ្យម្ចាស់ម៉ូតូមិនស្គាល់ម៉ាក ដួលបោកក្បាលទៅនឹងថ្នល់រងរបួសធ្ងន់ធ្ងរ ចំណែកឯម្ចាស់ម៉ូតូសង់ការ៉េ រងរបួសស្រាល។
ក្រោយពីកើតហេតុ យុវជនរងគ្រោះ ត្រូវរថយន្តសាមុយដឹកយកទៅសង្គ្រោះនៅមន្ទីរពេទ្យ ចំណែកម៉ូតូទាំងពីរគ្រឿង ត្រូវសមត្ថកិច្ចមូលដ្ឋាន និងនគរបាលចរាចរ ខណ្ឌចំការមន ចុះវាស់វែងអូសយកទៅរក្សាទុកនៅអធិការដ្ឋាននគរបាលខណ្ឌចំការមន៕
ដោយ៖ ហេង នាង
