ក្រសួងសុខាភិបាល បានចេញសេចក្តីណែនាំពីការត្រៀមជួយសង្គ្រោះពេលមានគ្រោះទឹកជំនន់
សារព័ត៌មាន Cambodia News/
ភ្នំពេញ (៤ មិថុនា ២០១៩) ៖ ក្រសួងសុខាភិបាលបានបញ្ជាក់ ដល់សាធារណជន ទាំងអស់ថា ការប្រែប្រួលអាកាសធាតុ ធ្វើឱ្យមាន ការផ្លាស់ប្ដូររដូវកាល និងបង្កឲ្យកើតមានជាញឹកញាប់ នូវគ្រោះធម្មជាតិ រលកកម្ដៅ ផ្គររន្ទះ ខ្យល់ព្យុះ ខ្យល់កន្ត្រាក់ និងគ្រោះរាំងស្ងួត ដែលគ្រោះមហន្តរាយទាំងនេះ បង្កនូវផលប៉ះពាល់ខូចខាត ដល់ហេដ្ឋារចនាសម្ព័ន្ធទ្រព្យសម្បត្តិ លំនៅដ្ឋាន ប៉ះពាល់សុខភាព និងស្លាប់អត់បងជីវិតប្រជាជន។
យោងតាមការប្រកាសរបស់ក្រសួងសុខាភិបាល កាលពីថ្ងៃទី ៣ ខែមិថុនា ឆ្នាំ ២០១៩ បានបញ្ជាក់ថា ដើម្បីកាត់បន្ថយឲ្យបានជាអតិប្បបរមា នូវផលប៉ះពាល់សុខភាព អាយុជីវិតជនរងគ្រោះ និងមូលដ្ឋានសុខាភិបាល ពីគ្រោះធម្មជាតិ ពិសេសគ្រោះទឹកជំនន់ រដ្ឋមន្ត្រីក្រសួងសុខាភិបាល បានអំពាវនាវឲ្យប្រជាពលរដ្ឋទាំងអស់ ចូលរួមប្រុងប្រយ័ត្តអោយខ្អស់។
លោករដ្ឋមន្ត្រីក្រសួងសុខាភិបាល បានបញ្ជាក់បន្ថែមថា ទាំងមុនពេល ក្នុងពេល និងក្រោយពេល ទឹកជំនន់ ប្រសិនបើលោកអ្នក មានបញ្ហាសុខភាព សូមស្វែងរកការពិគ្រោះ ពិនិត្យ និងព្យាបាលជំងឺ ជាបន្ទាន់នៅប៉ុស្តិ៍សុខភាព ក្បែរទីទួលសុវត្ថិភាព ឬមណ្ឌលសុខភាព ឬមន្ទីរពេទ្យ ដែលនៅជិតលោកអ្នកបំផុត។
ក្រសួងសុខាភិបាល បានដែរនាំមន្ទីរសុខាភិបាលរាជធានី ខេត្ត ទាំងអស់ឲ្យត្រៀមលក្ខណៈ រួចជាស្រេច នូវឱសថ បរិក្ខារពេទ្យ សេរ៉ូមប្រឆាំងពិសពស់ សម្រាប់ជួយអន្តរាគមន៍ នៅពេលមានពស់ចឹក ព្រមទាំងត្រៀម ក្រុមគ្រូពេទ្យចល័ត ដើម្បីជួយពិនិត្យព្យាបាលជំងឺ ជូនប្រជាពលរដ្ឋដែលមាន បញ្ហាសុខភាពឲ្យបានល្អប្រសើរ និងទាន់ពេលវេលា ៕
