អង្គការ Amnesty International អំពាវនាវរកជំនួយជួយជនភៀសសឹកភូមា
អង្គការ Amnesty International កំពុងតែអំពាវនាវរកជំនួយជួយជនភៀសសឹកភូមាប្រមាណជា ១សែន៥ម៉ឺននាក់ ដែលជាប់នៅទល់ដែនភូមានិងថៃ។
ជនភៀសខ្លួនភូមា (Credit: Reuters)
អង្គការនេះនិយាយថា ជំនួយអន្ដរជាតិដើម្បីកំណែទម្រង់ ដែលកំពុងតែប្រព្រឹត្តទៅនៅ ប្រទេសភូមា មិនត្រូវធ្វើឡើងដោយពុំមានការគិតគូរទុកថវិកាសម្រាប់ជួយដល់ជំរំជនភៀសខ្លួនទាំងឡាយនោះឡើយ។
លោកស្រី Claire Mallinson នាយិកាជាតិប្រចាំអង្គការ Amnesty International នៅប្រទេសអូស្រ្តាលី មានប្រសាសន៍ថា មានការបារម្ភជាក់ស្ដែងនៅក្នុងចំណោមជនភៀសខ្លួនទាំងនោះ។
លោកស្រីនាយិកានៃអង្គការ Amnesty International និយាយថា ជនភៀសខ្លួនទាំងនោះចង់វិលត្រឡប់ទៅស្រុកវិញ ក៏ប៉ុន្តែពលរដ្ឋមួយចំនួនដែលលោកស្រីបានជួបនៅក្នុងជំរំបាននិយាយប្រាប់លោកស្រីថា ពួកគេមានការភ័យខ្លាចជាខ្លាំង ថាប្រទេសភូមាមិនទាន់មានសុវត្ថិភាពនៅឡើយទេ៕