វៀតណាមថ្កោលទោសកោះតៃវ៉ាន់ចំពោះការធ្វើសមយុទ្ធនៅកោះមានជម្លោះ
សារព័ត៌មាន Cambodia News/
ហាណូយ (៣១ មីនា ២០១៧) ៖ ប្រទេសវៀតណាមកាលពីម្សលមិញបានប្រកាសថ្កោលទោសកោះតៃវ៉ាន់ចំពោះ ការធ្វើសមយុទ្ធយោធានៅតំបន់កោះកំពុងមានជម្លោះ នៅតំបន់សមុទ្រចិនខាងត្បូង និងថែមទាំងបានហៅ ទង្វើខាងលើនេះថា ជាការរំលោភបំពានយ៉ាងធ្ងន់ធ្ងរចំពោះដែនអធិបតេយ្យវៀតណាម និងសន្តិសុខនាវាចរថែមទៀតផង។ នេះបើតាមការចេញផ្សាយដោយសារព័ត៌មាន Channel News Asia ។
តៃវ៉ាន់បានបញ្ជាក់ថា ពួកគេនឹងធ្វើសមយុទ្ធឆ្មាំសមុទ្រនៅកោះ Itu Aba នៅឆ្នាំនេះ ដូចពេលមុនៗទៀត ដែលចាប់ពីថ្ងៃពុធ ហើយបញ្ចប់នៅថ្ងៃសុក្រនេះ។ ចំណែកវៀតណាម បានប្រឆាំងនឹងការធ្វើសមយុទ្ធនោះថា បានធ្វើឲ្យប៉ះពាល់ដល់ដែនអធិបតេយ្យភាព ដែលប៉ះពាល់ដល់កោះកំពុងមានជម្លោះគឺកោះស្ព្រាតលី និង ប៉ះពាល់ដល់សន្តិសុខរបស់វៀតណាម។
គួរបញ្ជាក់ថា ចិនអះអាងថា តំបន់ជាច្រើននៅសមុទ្រចិនខាងត្បូងដែលទទួលបានតម្លៃ៥ទ្រីលានដុល្លារពីការដឹកជញ្ជូនទំនិញឆ្លងកាត់ក្នុង១ឆ្នាំៗថា ជាកម្មសិទ្ធិរបស់ខ្លួន ចំណែកប្រទេសផ្សេងៗទៀតដូចជា ប្រុយណេ ម៉ាឡេស៊ី ហ្វីលីពីន តៃវ៉ាន់ និង វៀតណាម ក៏អះអាងថា មានកម្មសិទ្ធិពួកគេនៅទីនោះដែរ៕
