យុវជនម្នាក់ត្រូវបានគេចាក់សម្លាប់នៅក្នុងបន្ទប់ទឹក
សារព័ត៌មាន Cambodia News/
កណ្តាល (០៣ កក្កដា ២០១៧) ៖ មានករណីឃាតកម្មចាក់សម្លាប់យុវជនម្នាក់ នៅក្នុងបន្ទប់ទឹក ផ្ទះល្វែងមួយកន្លែង ស្ថិតនៅក្នុងភូមិតាខ្មៅ១ សង្កាត់តាខ្មៅ ក្រុងតាខ្មៅ កើតឡើងនៅម៉ោងប្រមាណជា ៥ និង១៥នាទីល្ងាច ថ្ងៃទី០២ ខែកក្កដា។
ជនរងគ្រោះត្រូវបានសមត្ថកិច្ចប្រាប់ថា មានឈ្មោះ ខា ស្នាក់នៅកន្លែងកើតហេតុ ហើយមានស្រុកកំណើត នៅស្រុកគងពិសី ខេត្តកំពង់ស្ពឺ។ លោកស្នងការបានបញ្ជាក់ថា ពាក់ព័ន្ធនឹងករណីឃាតកម្មនេះ សមត្ថកិច្ចរបស់លោកកំពុងធ្វើការពិនិត្យកន្លែងកើតហេតុ និងស្រាវជ្រាវស្វែងរកចាប់ជនល្មើស មកដាក់ទោសតាមច្បាប់។
បើតាមយុវជនម្នាក់ ដែលសាក្សីនៅកន្លែងកើតហេតុបានឲ្យដឹងថា ដំបូងឡើយជនល្មើស បានចូលក្នុងបន្ទប់ទឹក ហើយចេញវិញដោយនិយាយថា បន្ទប់ទឹកស្ទះឲ្យយុវជនរងគ្រោះចូលទៅមើល ស្រាប់តែចូលក្នុងបន្ទប់ទឹក ឮសំឡេងប្រតាយប្រតប់ក្នុងបន្ទប់ទឹក រួចជនល្មើសក៏ចេញពីបន្ទប់មកវិញ ហើយប្រាប់យុវជនជាសាក្សីថា ជនរងគ្រោះដួលបោកក្បាល បែកឈាមយកក្រណាត់ជូតឲ្យគេផង ខណៈដៃរបស់ជនល្មើសមានកាំបិតជាប់ជាមួយផងដែរ។ ឃើញសភាពបែបនេះ យុវជនដែលជាសាក្សី បានរត់ចេញពីកន្លែងកើតហេតុ និងបានរាយការណ៍ពីហេតុការណ៍នេះជូនសមត្ថកិច្ច៕
