អ្នកមិនចោលសំរាមក្នុងធុងសំរាមនឹងទទួលការផាកពិន័យ
សារព័ត៌មាន Cambodia News/
ភ្នំពេញ (១៣ មករា ២០១៦) ៖ ក្នុងរយៈពេលដ៏ខ្លី ខាងមុខនេះ រាល់អ្នកដែលចោលសំរាមផ្តេសផ្តាស នៅតាមទីសាធារណៈ នឹងត្រូវពិន័យជាប្រាក់ចាប់ពី២០០រៀល ដល់១០,០០០រៀល។
លោកប៉ា សុជាតិវង្សអភិបាលក្រុងភ្នំពេញបានឲ្យដឹងនៅលើគេហទំព័រហ្វេកប៊ុក នៅថ្ងៃទី១២មករានេះថា ភ្នាក់ងារសាលារាជធានីភ្នំពេញដែលអនុវត្តការប្រមូលសំរាម ពួកគាត់ក៏មានវិក័យប័ត្រជាប់នឹងខ្លួនផងដែរ ដើម្បីផាកពិន័យដល់អ្នកចោលសំរាមពាសវាលពាសកាល ក្រៅធុងសំរាម។
សាលារាជធានីនឹងអនុវត្តសាកល្បងមុនគេ នៅតាមសួនច្បារវិមានឯករាជ្យ សួនមុខវាំង មាត់ទន្លេ និងវត្តភ្នំ។ ភ្នាក់ងារដែលនឹងធ្វើកិច្ចការនេះ នឹងជ្រើសរើសពីបុគ្គលិកអង្គភាពសួនច្បារ ហើយក៏នឹងផ្តល់ឱកាសដល់ប្រជាពលរដ្ឋដែលឥតទីពឹង ពីមជ្ឍមណ្ឌលសង្គមកិច្ចព្រៃស្ពឺផងដែរ៕
