សម្តេចតេជោ អញ្ជើញគោរពវិញ្ញាណក្ខន្ធ ព្រះបាទ ភូមិបុល អាឌុលយ៉ាដេត នៅស្ថានទូតថៃ
សារព័ត៌មាន Cambodia News/
ភ្នំពេញ (១៧ តុលា ២០១៦) ៖ នាព្រឹកថ្ងៃទី១៧ ខែតុលា នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញដឹកនាំគណៈប្រតិភូជាន់ខ្ពស់ នៃរាជរដ្ឋាភិបាល អញ្ជើញចូលគោរពវិញ្ញាណក្ខន្ធ ព្រះករុណា ព្រះបាទ ភូមិបុល អាឌុលយ៉ាដេត ព្រះមហាក្សត្រ នៃព្រះរាជាណាចក្រថៃឡង់ដ៍ នៅស្ថានទូតថៃ ប្រចាំព្រះរាជាណាចក្រកម្ពុជា ។
នៅក្នុងការអញ្ជើញចូលរួមពិធីដ៏ក្រៀមក្រំនេះ សម្តេចតេជោនាយករដ្ឋមន្ត្រី បានអញ្ជើញដាក់កម្រផ្កា និងបានបង្ហាញការចូលរួមរំលែកទុក្ខ តាមរយៈសារលិខិតថា «តាងនាមរាជរដ្ឋាភិបាល និងប្រជាជនកម្ពុជា ខ្ញុំសូមសម្ដែងនូវសមានចិត្ត យ៉ាងជ្រាលជ្រៅ និងការចូលរួមរំលែកទុក្ខ យ៉ាងក្រៀមក្រំបំផុត ថ្វាយព្រះមហាក្សត្រិយានី និងព្រះរាជវង្សានុវង្ស ក៏ដូចជាជូនរដ្ឋាភិបាល និងប្រជាជន នៃព្រះរាជាណាចក្រថៃ ចំពោះការសោយ ព្រះទិវង្គត របស់ព្រះករុណា ព្រះបាទ ភូមិបុល អាឌុលយ៉ាដេត ព្រះមហាក្សត្រជាទីគោរពស្រឡាញ់ នៃប្រទេសថៃ និងជាព្រះមហាក្សត្រ ដែលបានគ្រងរាជសម្បត្តិយូរបំផុតក្នុងពិភពលោក កាលពីថ្ងៃទី ១៣ ខែ តុលា ឆ្នាំ ២០១៦»។
សារលិខិតរំលែកទុក្ខរបស់សម្តេចតេជោ បានបន្តថា «ការសោយព្រះទិវង្គត របស់ព្រះអង្គ គឺជាការបាត់បង់ដ៏ធំធេង របស់ប្រជាជន និងប្រទេសថៃ ក៏ដូចជាសម្រាប់មិត្តភក្ដិទាំងអស់ លើពិភពលោក។ សូមជូនដួងព្រះវិញ្ញាណក្ខន្ធ របស់ព្រះអង្គបានយាងទៅកាន់សុគតិភព ជារៀងរហូត។
សូមរំឭកថា ព្រះករុណា ព្រះបាទ ភូមិបុល អាឌុលយ៉ាដេត ព្រះមហាក្សត្រនៃព្រះរាជាណាចក្រថៃឡង់ដ៍ ជាស្តេចដែលគ្រងរាជ្យបានយូរជាងគេបំផុត នៅលើពិភពលោក បានសោយទិវង្គត កាលពីថ្ងៃទី១៣ ខែតុលា ឆ្នាំ២០១៦កន្លងទៅនេះ ក្នុងព្រះជន្មាយុ៨៨ព្រះវស្សា នៅមន្ទីរពេទ្យមួយ នាទីក្រុងបាងកក ដោយរោគាពាធ៕
