បុរសម្នាក់ត្រូវយុវជន ១ក្រុមបាញ់ ១គ្រាប់រងរបួសធ្ងន់
ភ្នំពេញ ៖ កាលពីវេលាម៉ោង៩និង៥០នាទីយប់ថ្ងៃ ទី១៨ ខែកុម្ភៈ បុរសម្នាក់ត្រូវជនសង្ស័យ១ក្រុមមានគ្នា ៥នាក់ ជិះម៉ូតូ២គ្រឿងដកកាំភ្លើងខ្លីបាញ់ ចំកំភួនជើងខាងស្ដាំបណ្ដាលឱ្យរងរបួសធ្ងន់គ្រាន់តែរឿងហៅមិនឈប់ ស្ថិតនៅមុខ ផ្ទះលេខ៣ ផ្លូវលេខ៣១៣ ក្រុម៣៦ ភូមិ៩ សង្កាត់បឹងកក់១ ខណ្ឌទួលគោក ។
ជនរងគ្រោះត្រូវបានគេ ស្គាល់ឈ្មោះ ចាន់ ដារ៉ា ភេទប្រុស អាយុ២៧ឆ្នាំ មុខ របរលក់ទូរស័ព្ទនៅផ្សារ៧មករា និង ស្នាក់នៅផ្ទះកើតហេតុខាងលើបានរង របួស១គ្រាប់ចំកំភួនជើងស្ដាំ ហើយត្រូវ បានក្រុមគ្រួសារដឹកយកទៅសង្គ្រោះនៅ មន្ទីរពេទ្យកាល់ម៉ែត។
ចំណែកក្រុមជនសង្ស័យត្រូវបានគេ អះអាងថា មានគ្នា៥នាក់ជិះម៉ូតូពីរគ្រឿង សុទ្ធតែម៉ាកហុងដាសេ១២៥ ពណ៌ខ្មៅ មិនចាំស្លាកលេខ និងស្លៀកពាក់ស៊ីវិល ប្រដាប់ដោយកាំភ្លើងខ្លីមួយដើមមិនស្គាល់ ម៉ាក ។ ក្រោយពីបាញ់ប្រហារទៅលើ ជនរងគ្រោះហើយបានគេចខ្លួនបាត់ ។
មុនពេលកើតហេតុជនរង គ្រោះបានជិះម៉ូតូ១គ្រឿងដឹកបងប្អូន២ នាក់យកមកផ្ទះ ។ ក្រោយដឹកមកដល់ផ្ទះ ហើយជនរងគ្រោះបានត្រឡប់ទៅវិញ ដើម្បីបន្ដដឹកប្អូនប្រុសម្នាក់ទៀត ។ ពេល ជនរងគ្រោះត្រឡប់ទៅផ្ទះជាលើកទី២ ស្រាប់តែមានក្រុមជនសង្ស័យ១ក្រុម មានគ្នា៥នាក់ជិះម៉ូតូ២គ្រឿងបានហៅ ជនរងគ្រោះឱ្យឈប់ ប៉ុន្ដែជនរងគ្រោះ មិនឈប់ទើបក្រុមជនសង្ស័យដែលមានចិត្ដឃោរឃៅបានដកកាំភ្លើងខ្លីបាញ់ ប្រហារទៅលើជនរងគ្រោះបណ្ដាលឱ្យរងរបួសតែម្ដង។
ចំពោះករណី បាញ់ប្រហារទៅលើជនរងគ្រោះខាងលើ នេះគឺមិនដឹងថាជារឿងគំនុំឬជារឿង អ្វីនោះទេ ហើយបច្ចុប្បន្នសមត្ថកិច្ចនគរ បាលខណ្ឌទួលគោកកំពុងធ្វើការស្រាវ ជ្រាវស្វែងរកចាប់ខ្លួនក្រុមជនសង្ស័យយកមកដាក់ទោសតាមច្បាប់ ៕ ហេង នាង
