សមត្ថកិច្ចបង្ក្រាបគ្រឿងសំអាងនិងឪសថគេចពន្ធជាង១តោននៅព្រលានយន្តហោះអន្តរជាតិសៀមរាប តាមជើងយន្តហោះមកពីប្រទេសកូរ៉េ
សារព័ត៌មាន Cambodia News/
សៀមរាប (២៥ មីនា ២០១៦) ៖ នៅវេលាម៉ោង ១១និង ៤៥នាទី កាលពីយប់ថ្ងៃទី ២៤ មិនាឆ្នាំ២០១៦ សមត្ថកិច្ចនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាល ខេត្តសៀមរាប បានធ្វើការបង្ក្រាបបទល្មើសគេចពន្ធពីសហរដ្ឋអាមេរិកនិងប្រទេសកូរ៉េ នូវគ្រឿងសំអាងនិងឪសថ មិនមានច្បាប់ទំលាប់និងចុះបញ្ជីការត្រឹមត្រូវពីស្ថាប័ន្ធជំនាញ។
ក្នុងនោះសមត្ថកិច្ចបានធ្វើការឃាត់បណ្តោះអាសន្ននូវ រថយន្តមួយគ្រឿងម៉ាកសាំយ៉ុងពាក់ស្លាកលេខ ភ្នំពេញ.២AF.៧២៥១ ពណ៌ស មានផ្ទុកនូវទំនិញគេចពន្ធឪសថនិងគ្រឿងសំអាងចំនួន៥៤កេះ ដែលមានទន្ងន់ជាង ១តោន។
បច្ចបុប្បន្នសមត្ថកិច្ចមិនទាន់បានរាប់និងត្រួតពិនិត្យនូវទំនិញគេចពន្ធទាំងនោះលំអិតនៅឡើយទេដោយរង់ចាំបង្កើតគណៈកម្មការអន្តរស្ថាប័ន ជាមុនសិន។ រាល់មុខទំនិញនិងម្ចាស់រួមទាំងអ្នកបើកបរត្រូវបានរក្សាទុកនិង ឃាត់ខ្លួនបណ្តោះអាសន្ននៅស្នងការ ដ្ឋាននគរបាលខេត្តរង់ចាំអនុវត្តតាមនិតិវិធីបន្ត។
តាមការបញ្ជាក់ពី លោកវរៈសេនីយ៍ឯន សឿន សេន នាយការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាល ខេត្តសៀមរាបបានឲ្យដឹងថា៖ នេះជាលើកទីមួយហើយដែលសមត្ថកិច្ចធ្វើការបង្ក្រាបបទល្មើសសេដ្ឋ កិច្ចទ្រង់ទ្រាយធំគេចពន្ធតាមរយៈជើងហោះហើរពីបរទេស (ប្រទេសកូរ៉េ) នៅអាកាសយានដ្ឋានអន្តរជាតិសៀមរាប៕
