ស្លាប់ក្រុមរដ្ឋអ៊ីស្លាម៣១នាក់ដោយសារការវាយប្រហារជើងអាកាស
សារព័ត៌មាន Cambodia News/
អ៊ីរ៉ាក់ (២២ មករា ២០១៦) ៖ តាមមន្ដ្រីសន្ដិសុខខេត្ដប្រាប់ដល់ទីភ្នាក់ងារសារព័ត៌មានចិនស៊ីនហ៊ួរឲ្យដឹងថា យ៉ាងហោចណាស់ក្រុមសកម្មប្រយុទ្ធរដ្ឋអ៊ីស្លាម៣១នាក់បានស្លាប់បាត់បង់ជីវិតកាលពីថ្ងៃទី២១មករា ដោយសារការវាយប្រហារតាមជើងអាកាស និងការប៉ះទង្គិចគ្នាជាមួយកងកម្លាំងសន្ដិសុខអ៊ីរ៉ាក់ ក្នុងខេត្ដភាគខាងលិចប្រទេស។
នៅក្នុងហេតុការណ៍មួយ មានក្រុមសកម្មប្រយុទ្ធរដ្ឋអ៊ីស្លាម១៨នាក់ត្រូវបានសម្លាប់ និងយានយន្ដរបស់ពួកគេ៥គ្រឿងត្រូវបានបំផ្លាញ ដោយការវាយប្រហារតាមជើងអាកាសរបស់ក្រុមចម្រុះអន្ដរជាតិដឹកនាំដោយអាមេរិក ទម្លាក់គ្រាប់ទៅលើទីតាំងពីររបស់ក្រុមរដ្ឋអ៊ីស្លាម។
ក្រៅពីនេះ នៅមានក្រុមសកម្មប្រយុទ្ធ១៣នាក់ផ្សេងទៀតត្រូវបានសម្លាប់ ក្នុងពេលប៉ះទង្គិចជាមួយកងកម្លាំងសន្ដិសុខអ៊ីរ៉ាក់៕
