សុគន្ធ និសា បង្ហោះសារ អំពាវនាវ អោយជួយ លោកយាយម្នាក់ លក់ផ្លែចាន់តាមផ្លូវ
សារព័ត៌មាន Cambodia News/
អត្តបទ ៖ ហេង នាង/
ភ្នំពេញ (២៨ កក្កដា ២០១៤) ៖ បច្ចុប្បន្ន ការធ្វើសកម្មភាពដើម្បីជួយសង្គមហាក់ដូចជាកំពុងកម្រើកឡើង ដែលនេះជាសញ្ញាល្អមួយ ដែលគួរតែទទួលការលើកទឹកចិត្ត និងជំរុញឲ្យបានផុសផុល ជាក់ស្តែងកន្លងទៅកាលពីពេលថ្មីៗ នេះ នៅតាមបណ្តាញ សង្គមហ្វេសប៊ុក ផ្ទាល់ខ្លួនរបស់ តារាចម្រៀងសម្ដីស្រទន់ កញ្ញា សុគន្ធ និសា ត្រូវបានបង្ហោះឡើង នូវរូបលោកយាយ ចាស់ជរាម្នាក់ ដែលក្នុងដៃ មានកាន់ផ្លែចាន់ ដើរលក់ នៅតាមដង មហាវិថី ព្រះមុនីវង្ស ម្តុំផ្សារថ្មី រាជធានីភ្នំពេញ។
តាមរយៈទិត្ថភាព បែបនេះ ដោយបង្ហាញ ក្តីអានិត កញ្ញា សុគន្ធ និសា បានបង្ហោះ រូបថត៣សន្លឹក ដែលជារូប ក្នុងខណៈ ដែល កញ្ញា ជួយទិញផ្លែចាន់ ពីលោកយាយ ក្នុងអត្ថន័យ ជាសារផ្តែរផ្តាំ ដល់អ្នកគាំទ្រ និងមិត្តភក្តិ ទាំង ឡាយ របស់កញ្ញា ឲ្យជួយលោកយាយ ម្នាក់នេះផង។
នៅក្នុងសារ របស់ កញ្ញា សុគន្ធ និសា បាន សរសេរថា៖ «ខ្ញុំមានចិត្តអាណិតអាសូរ ដល់លោកយាយ ខ្ញុំមិនអាចជួយដល់ជីវិតគាត់បានទេ ខ្ញុំអាចត្រឹមតែជួយទិញផ្លែចាន់ពីគាត់ប៉ុណ្ណោះ» តាមរយៈសារមួយនេះ បានធ្វើឲ្យអ្នក ដែលនិយមលេងបណ្តាញសង្គម Facebook និងទស្សនិកជនមួយចំនួន មានការរញ្ជូលចិត្ត នឹងស្ងើចសរសើរពីទឹកចិត្តសប្បុរស របស់តារាចម្រៀងមួយដួងនេះ។
នៅក្នុងបរិបទបែបនេះ ការបំផុសចលនានាំគ្នាចូលរួមក្នុងសកម្មភាពសង្គម ឬការពង្រីកវប្បធម៌ចែករម្លែកក្នុងចំណោមពលរដ្ឋខ្មែរគឺជាសកម្មភាពដ៏មានសារសំខាន់ ដែលមិនអាចមើលរំលងបាន៕
