អ៊ីស្រាអែលផ្តល់ភ្លើងខៀវអោយដោះលែងអ្នកទោសប៉ាឡេស្ទីន២៦នាក់
នៅថ្ងៃចន្ទនេះ អ៊ីស្រាអែលបានចេញផ្សាយបញ្ជីអ្នកទោសប៉ាឡេស្ទីនចំនួន២៦នាក់ ដែលនឹងត្រូវបានដោះលែង ក្នុងរយៈពេលប៉ុន្មានថ្ងៃខាងមុខនេះ។ រដ្ឋាភិបាលអ៊ីស្រាអែលបាន ផ្តល់ភ្លើងខៀវដោះលែងអ្នកទោសប៉ាឡេស្ទីន ដើម្បីឆ្លើយតបទៅនឹងក្របខណ្ឌនៃកិច្ចចរចាស្វែងរកសន្តិភាព ឡើងវិញ ជាមួយប៉ាឡេស្ទីន។
អ្នកទោសទាំង២៦នាក់ ដែលនឹងត្រូវដោះលែងនេះ ជាប់ទោសពីបទឃាតកម្ម ជាអ្នកទោសស្ថិតក្នុងចំណោមអ្នកទោសប៉ាឡេស្ទីន១០៤នាក់ ដែលអ៊ីស្រាអែលត្រូវដោះលែង ដើម្បីឆ្លើយតបទៅនឹងក្របខណ្ឌនៃការចរចាស្វែងរកសន្តិភាពជាមួយ ប៉ាឡេស្ទីនឡើងវិញ។ អ៊ីស្រាអែលបានឃុំខ្លួនអ្នកទោសទាំង១០៤នាក់នេះ មុនកិច្ចព្រមព្រៀងសន្តិភាពក្រុងអូស្លូ ឆ្នាំ១៩៩៣។ ក្នុងចំណោមអ្នកទោសប៉ាឡេស្ទីនទាំង១០៤ នាក់ ភាគច្រើនជាប់ពាក់ព័ន្ធនឹងការញុះញង់អោយជនជាតិអ៊ីស្រាអែលបាត់បង់ជីវិត។
ក្នុងចំណោមអ្នកទោសទាំង២៦នាក់ អ្នកទោស២០នាក់ ស្ថិតក្នុងចលនាក្រុមហ្វាតារ របស់ប្រធានរដ្ឋអំណាចប៉ាឡេស្ទីន ម៉ាមូដ អាបាស។ ពីរនាក់ទៀត ជាសមាជិករណសិរ្សរំដោះប៉ាឡេស្ទីន។ អ្នកទោស១៤នាក់ នឹងត្រូវបញ្ជូនទៅហ្កាហ្សា ហើយ១២នាក់ទៀត ទៅស៊ីសហ្ស៊កដានី។ នៅក្នុងបញ្ជីដោះលែងនេះ អ្នកទោស៨នាក់ ជាធម្មតានឹងត្រូវដោះលែងក្នុងរយៈពេល៣ឆ្នាំខាងមុខ ហើយពីរនាក់ទៀត ត្រូវមានសេរីភាពក្នុង៦ខែទៀត។
គ្រួសារជនជាតិអ៊ីស្រាអែលដែលបាត់បង់ជីវិតដោយទង្វើរបស់អ្នកទោស ប៉ាឡេស្ទីន មានរយៈពេល៤៨ម៉ោង ដើម្បីដាក់ពាក្យប្តឹងជំទាស់ការដោះលែងនេះ ទៅកាន់តុលាការយុត្តិធម៌កំពូល។
ដោយឡែក ការដោះលែងអ្នកទោសប៉ាឡេស្ទីន នឹងធ្វើឡើងក្នុង៤ដំណាក់កាល។ អ៊ីស្រាអែលនឹងដោះលែងអ្នកទោសជា៤ ដំណាក់កាលបន្តបន្ទាប់ ប្រសិនការចរចាជាមួយប៉ាឡេស្ទីនបានជឿន លឿន ទៅមុខ។ រដ្ឋាភិបាលអ៊ីស្រាអែលបានប្រកាសគណៈកម្មការក្រសួងទទួលបន្ទុកដោះលែង អ្នកទោស ប៉ាឡេស្ទីន មកពីក្រសួងចំនួន៣ ៖ គឺក្រសួងការពារជាតិ ក្រសួងយុត្តិធម៌ និងក្រសួងសន្តិសុខ។ យោងតាមគណៈកម្មការក្រសួងទាំងនេះ ក្នុងចំណោមអ្នកទោសដែលអ៊ីស្រាអែលដោះលែង ប្រសិនបើអ្នកទោស ណាម្នាក់បង្កសកម្មភាពប្រឆាំងអ៊ីស្រាអែលសាជាថ្មីនោះ អ្នកទោសនោះនឹងត្រូវបញ្ជូនត្រលប់ទៅពន្ធនាគារវិញ ដើម្បីបន្តជាប់ឃុំតទៅទៀត៕ដោយ ព្រំ សឿន សូលីណា (RFI)
