ការចាកចេញរបស់លោក សម រង្ស៊ី មិនមែនជាភាពចៃដន្យ
ភ្នំពេញ៖ ប្រធានគណបក្សសង្គ្រោះជាតិ លោក សម រង្ស៊ី ដែលកំពុងតែកើនប្រជាប្រិយតាមរយៈសំឡេងឆ្លោត ពីអ្នកគាំទ្រភាគច្រើនជាយុវជននោះ ពេលនេះ កំពុងតែគេចចេញពីប្រទេសកម្ពុជាហើយ ដោយបន្សល់នូវភាពមន្ទិលសង្ស័យជាច្រើនពីសំណាក់ប្រជាពលរដ្ឋខ្មែរ ដែលជាម្ចាស់ឆ្នោត។
ដំណឹងដែលទាក់ទងនឹងការចាកចេញពីប្រទេសរបស់លោក សម រង្ស៊ី ត្រូវបាន លោក កឹម សុខា ប្រធានស្ដីទីគណបក្សសង្គ្រោះជាតិ ប្រកាសថា «ការចាកចេញពីប្រទេសរបស់លោក សម រង្ស៊ី ពេលនេះគឺជាគម្រោងផ្ទាល់ខ្លួនរបស់លោក សម រង្ស៊ី គឺមិនមែនជាភាពចៃដន្យនោះទេ»។
ទោះបីយ៉ាងណា អ្នកតាមដានស្ថានការណ៍នយោបាយវិវត្តនៅប្រទេសកម្ពុជាបានកត់សម្គល់ ឃើញថា ការដែលលោក សម រង្ស៊ី យកពេលវេលាដ៏ក្ដៅគគុកទៅសហរដ្ឋអាមេរិក ដើម្បីរៀបចំមង្គលការកូនស្រីពៅរបស់លោកនោះ វាឆ្លុះបញ្ចាំងយ៉ាងជាក់ស្ដែងពីមេដឹកនាំគណបក្សប្រឆាំងរូបនេះថា ខ្វះភាពទំនួលខុសត្រូវ ចំពោះសភាពការណ៍នយោបាយ។
អ្នកវិភាគនយោបាយ លោកបណ្ឌិត សុខ ទូច បានបង្ហាញការយល់ឃើញថា «ប្រសិនលោក សម រង្ស៊ី ទៅអាមេរិក ក្នុងបុព្វហេតុការកូន ស្របពេលដែលស្រុកទេសកំពុងមានបញ្ហា ហើយគាត់គឺជាគន្លឹះនៃដោះស្រាយបញ្ហា វាមិនសមទេ ជាកញ្ចក់ឆ្លុះបញ្ចាំង នៅពេលដែលប្រទេសជាតិសុទ្ធតែប្តូរជីវិត គេសុទ្ធតែយកជីវិតមកដាក់ ដើម្បីការពារគាត់ ដើម្បីការពារប្រជាធិបតេយ្យ ដើម្បីការពារសន្លឹកឆ្នោត ដល់ពេលស្រុកមានអញ្ចឹង ហើយយកអាហ្នឹងធ្វើជាធំ ធ្វើអោយប្រជាពលរដ្ឋដែលជាម្ចាស់ឆ្នោត ក៏គេអាចឆ្លុះបញ្ចាំងបានដែរ»៕ Cambodia News
