លោក ហ៊ុន សែន គាំទ្រឱ្យមានច្បាប់ក្រមសីលធម៌អ្នកនយោបាយ
ភ្នំពេញ៖ នៅព្រឹកថ្ងៃទី១៤ មករា ២០១៣នេះ លោក ហ៊ុន សែន នាយករដ្ឋមន្រ្តី នៃកម្ពុជា បានគាំទ្រឱ្យមានក្រមសីលធម៌អ្នកនយោបាយ នៅក្នុងប្រទេសកម្ពុជា ដើម្បីជាប្រយោជន៍ ក្នុងការលើកកម្ពស់ការ និយាយស្តីប្រកបដោយសីលធម៌។
ថ្លែងនៅក្នុងពិធីចុះចែក សញ្ញាប័ត្រដល់ និស្សិតសកលវិទ្យាល័យ បញ្ញាសាស្រ្ត កាលពីព្រឹកថ្ងៃទី១៤ ខែមករា លោក នាយករដ្ឋមន្រ្តី ហ៊ុន សែន បានលើកឡើងពីការប្រើពាក្យ ជេរប្រមាថយ៉ាងធ្ងន់ធ្ងរ ដូចជា ប្រើពាក្យក្បាល យួនខ្លួនខ្មែរ និងពាក្យអាក្បត់ជាតិ ដែលជាការ ប្រមាថយ៉ាងធ្ងន់ ដូច្នេះ លោកគាំទ្រឲ្យ មានក្រមសីលធម៌ អ្នកនយោបាយ ប៉ុន្តែត្រូវ អនុម័ត ដើម្បីចងជាច្បាប់ ហើយបើនរណា ហ៊ានប្រើពាក្យ ជេរប្រមាថទាំងនេះ ត្រូវជាប់ពន្ធនាគារ។
លោក នាយករដ្ឋមន្រ្តីហ៊ុន សែន បានបន្ថែមទៀតថា «បើមានក្រមហ្នឹងគឺវាល្អហើយ ចងវាឲ្យជាប់ហើយដាក់មកដើម្បី អនុម័តបង្កើតឲ្យទៅជា ច្បាប់តែម្តង បើអ្នកនយោបាយណាហ៊ានប្រើពាក្យហ្នឹង ត្រូវជាប់ទោស»។
សម្រាប់លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា មិនបានគាំទ្រឲ្យមានការបង្កើតច្បាប់នេះទេ ព្រោះជាធម្មតាអ្នកនយោបាយ និងតំណាងរាស្រ្ត មិនគួរគប្បីប្រើពាក្យអសុរសទាំងនេះចេញមកទេ ហើយគួរតែទុក្ខឲ្យប្រជាពលរដ្ឋជាអ្នកធ្វើការវិនិច្ឆ័យវិញល្អជាង៕
