ប៉ាពួនូវែលហ្គីណេ មិនបើកទូលាយក្នុងការផ្តល់សិទ្ធិតាំងលំនៅដល់ជនស្វែងសុំសិទ្ធិជ្រកកោនឡើយ
មកទល់នឹងថ្ងៃសុក្រនេះ អូស្ត្រាលីបានបញ្ជូនក្រុមជនស្វែងសុំសិទ្ធិជ្រកកោនចំនួនពីរ ក្រុមហើយ ទៅកាន់ប្រទេសប៉ាពួនូវែលហ្គីណេ ដើម្បីរង់ចាំការពិនិត្យឯកសារនៅប្រទេសនោះ។
ទន្ទឹម គ្នានេះ រដ្ឋមន្រ្តីទទួលបន្ទុកផ្នែកគម្រោងជាតិរបស់ប្រទេសប៉ាពួនូវែល ហ្គីណេ លោក Charles Abel មានប្រសាសន៍ថា លោកមិនរំពឹងថាមានជនភៀសខ្លួនច្រើននាក់ទេ ដែលនឹងទទួលបានសិទ្ធិតាំងទីលំនៅក្នុងប្រទេសប៉ាពួនូវែល ហ្គីណេ ក្រោមកិច្ចព្រមព្រៀងស្តីអំពីជនភៀសខ្លួន ដែលទើបបានចុះហត្ថលេខា ជាមួយប្រទេសអូស្ត្រាលី។
លោក Charles Abel មានប្រសាសន៍បន្ថែមថា មិនទាន់ដល់ពេល ដែលត្រូវរៀបគម្រោងអំពីទីកន្លែង ដែលជនភៀសខ្លួនក្នុងប្រទេសប៉ាពួនូវែលហ្គីណេ អាចនឹងត្រូវតាំងទីលំនៅនោះទេ។
សូមបញ្ជាក់ថា តួលេខរបស់រដ្ឋាភិបាលអូស្ត្រាលី ដែលចេញផ្សាយកាលពីដើមឆ្នាំនេះ បានបង្ហាញថា ជនស្វែងសុំសិទ្ធិជ្រកកោន ដែលមកដល់ប្រទេសអូស្ត្រាលីតាមទូក ជាង ៩០% បានការទទួលស្គាល់ថាជាជនភៀសខ្លួនពិតប្រាកដ៕ (Radio Australia)
