សម្ថកិច្ចចាប់បានចោរ ២នាក់ ដែលធ្វើសកម្មភាពឆក់ទូរស័ព្ទដៃពីជនជាតិចិន
Cambodia News
ព័ត៌មានសន្ថិសុខ
ភ្នំពេញ៖ កាលពីវេលាម៉ោង៤និង៥០នាទីល្ងាច ថ្ងៃទី២៣ ខែមេសា ចោរឆក់ពីរនាក់បាននាំគ្នាជិះម៉ូតូធ្វើសកម្មភាពឆក់ទូរស័ព្ទដៃម៉ាកអាយហ្វូនហ្វាយ ពីជនជាតិចិនម្នាក់ នៅចំណុចផ្លូវនីរុស មុខផ្សាញ៉ែ ស្ថិតក្នុងសង្កាត់ផ្សារដេប៉ូទី២ ខណ្ឌទួលគោក ខណៈដែលជនរងគ្រោះកំពុងជិះរ៉ឺម៉កម៉ូតូ ហើយដកទូរស័ព្ទនិយាយ។
ចោរឆក់ពីរនាក់ខាងលើ ម្នាក់ ឈ្មោះ មុន តារា អាយុ២៥ឆ្នាំស្នាក់នៅផ្ទះលេខ៤១ មហាវិថីកម្ពុជាក្រោម សង្កាត់មិត្តភាព ខណ្ឌ៧មករា និងម្នាក់ទៀតឈ្មោះ ប៉េ រ៉ាវី អាយុ២០ឆ្នាំ ស្នាក់នៅផ្ទះលេខ៤១៨ មហាវិថីកម្ពុជាក្រោម សង្កាត់មិតភាពថ្មី ខណ្ឌ៧មករា ជិះម៉ូតូម៉ាកស្កូបពី ពណ៌ស ពាក់ស្លាកលេខភ្នំពេញ 1BD-7519។
នៅចំពោះមុខសមត្ថកិច្ចយុវជន ប៉េ រាវី និង មុន តារា បានឆ្លើយសារភាពថា ខ្លួនបានជិះម៉ូតូធ្វើសកម្មភាពឆក់ពិតប្រាកដមែន។ រីឯម៉ូតូដែលពួកគេជិះគឺពួកគេបានខ្ចីពីមិត្តស្រី ក្នុងបំណងជិះដើរលេង រួចក៏ធ្វើសកម្មភាពឆក់ទូរស័ព្ទតែម្តង។
ក្រោយពីដែលពួកគេធ្វើសកម្មភាពឆក់ទូរស័ព្ទពីជនបរទេសបានសម្រេចហើយ គឺពួកគេបានព្យាយាមជិះម៉ូតូរត់គេចចូលទៅកន្លែងអ៊ីនធើណែត ឈ្មោះ ហុងកុងណែត ប៉ុន្តែត្រូវសមត្ថកិច្ចព័ទ្ធចាប់ខ្លួនបានទាំងពីរនាក់តែម្តង។
បច្ចុប្បន្នចោរឆក់ទាំងពីរនាក់ ត្រូវសមត្ថកិច្ចកំពុងសាកសួរនៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់៕ ហេង នាង
