ម៉ូតូពីរគ្រឿង ជិះមិនប្រយ័ត្នបុកគ្នា រងរបួសស្រាល
ភ្នំពេញ៖ កាលពីវេលាម៉ោង ១២និង១៥នាទី ថ្ងៃទី០៦ ខែមិនា មនុស្ស៣នាក់បានរងរបួសស្រាល ដោយសារតែជិះម៉ូតូពីរគ្រឿងបុកគ្នា នៅលើដងផ្លូវលេខ៤៣២ ស្ថិតក្នុងសង្កាត់បឹងត្របែក ខណ្ឌចំការមន។
អ្នករងរបួសទាំងអស់ក្នុងហេតុការណ៍ខាងលើនេះ មិនត្រូវស្គាល់អត្តសញ្ញាណឡើយ ដោយសារក្រោយហេតុការណ៍កើតឡើង ពួកគេទាំងសងខាងបាននិយាយសម្រុះសម្រួលគ្នា បញ្ចប់រឿងប៉ះទង្គិចគ្នា តិចតួចដោយមិនប្តឹងផ្តល់អ្វីឡើយ។
ហេតុការណ៍ខាងលើនេះ កើតឡើងដោយសារម៉ូតូម៉ាកឃ្លីក ពណ៌ផ្ទៃមេឃ ជិះធ្វើដំណើរតាមបណ្តោយផ្លូវលេខ៤៣២ ក្នុងទិសដៅពីកើតមកលិច លុះដល់ចំណុចកើតហេតុខាងលើ ក៏បុកគ្នាជាមួយម៉ូតូសង់កូរ៉េ ដែលបានបើកបរក្នុងទិសដៅពីលិចទៅកើត បញ្ច្រាសទិសគ្នា បណ្តាលឲ្យដួលជាប់គ្នាទាំងពីរគ្រឿង៕ ហេង នាង
