សមត្ថកិច្ចចាប់ខ្លួនមុខសញ្ញាចែកចាយថ្នាំញៀន ២នាក់
ភ្នំពេញ ៖ កាល ពីវេលាម៉ោង២៣និង១៥នាទី ថ្ងៃទី៥ ខែ កុម្ភៈ មុខសញ្ញាចែកចាយនិងប្រើ ប្រាស់ថ្នាំញៀន២នាក់ ក្នុងចំណោមបក្ខពួក ៣នាក់ ត្រូវកម្លាំងនគរបាលប៉ុស្ដិ៍ច្បារ អំពៅទី២ចាប់ខ្លួន ស្ថិតនៅតាមបណ្ដោយផ្លូវ លេខ៣៥៧ ភូមិដើមស្លែង សង្កាត់ច្បារ អំពៅទី២ ខណ្ឌមានជ័យ ។
ជនសង្ស័យទាំង២នាក់មានឈ្មោះ ឡេង រ៉ាណូ ហៅ ក្រិត ភេទប្រុស អាយុ ១៨ឆ្នាំ មុខរបរសិស្ស និងឈ្មោះ នៅ ស៊ីណា ភេទប្រុស អាយុ១៧ឆ្នាំ មុខរបរសិស្ស ។ ចំណែកម្នាក់ទៀតរត់គេចខ្លួនមានឈ្មោះ ធ្មេញ ភេទប្រុស អាយុ២៥ឆ្នាំ មុខរបរ កសិករ ។ ជនសង្ស័យទាំង៣នាក់នេះមាន ទីលំនៅជាមួយគ្នា នៅភូមិរទាំង ឃុំភូមិធំ ស្រុកកៀនស្វាយ ខេត្ដកណ្ដាល ។
ក្នុងករណីបង្ក្រាបមុខសញ្ញាជួញដូរ ថ្នាំ ញៀននេះដែរ សមត្ថកិច្ចដកហូតម៉ូតូ១គ្រឿង ម៉ាកស្មាស ពាក់ស្លាកលេខកណ្ដាល 1B-8508, ទូរស័ព្ទម៉ាកណូគា១គ្រឿង និងថ្នាំញៀន៦កញ្ចប់តូច ។
នៅក្នុងថ្ងៃឃាត់ខ្លួនមុខសញ្ញាជួញដូរថ្នាំញៀនខាងលើនេះ ក្នុងពេលដែលកម្លាំង ល្បាតបានជួបប្រទះមុខសញ្ញាគួរឱ្យសង្ស័យ ក៏ឃាត់ខ្លួនសាកសួរ ពេលនោះជនសង្ស័យ ម្នាក់បានទម្លាក់ថ្នាំញៀនចោល ដើម្បី បំបិទដាន តែត្រូវសមត្ថកិច្ចរើសយកមក ពិនិត្យឃើញសុទ្ធតែថ្នាំញៀន ក៏ឃាត់ខ្លួន បាន២នាក់ក្នុងចំណោមបក្ខពួក៣នាក់ ៕
ដោយ៖ ហេង នាង
