បុរសម្នាក់ស្លាប់ និង ២នាក់ទៀតរបួសធ្ងន់ដោយសារជិះម៉ូតូទៅខឿនថ្នល់
ភ្នំពេញ៖កាលពីវេលាម៉ោង ៣និង០០នាទីទាបភ្លឺ ថ្ងៃទី២៧ ខែមករា បុរសម្នាក់បានស្លាប់បាត់បង់ជីវិតនៅនឹងកន្លែងកើតហេតុ និង២នាក់ទៀតរងរបួសយ៉ាងធ្ងន់ធ្ងរ ខណៈដែលមានក្មេងស្ទាវមួយក្រុមជិះម៉ូតូដេញតាមពួកគេបណ្ដាលមានការ ភ័យស្លន់ស្លោពេក ក៏ជិះម៉ូតូទៅបុកខឿនថ្នល់នៅចំណុចមុខសាលារៀនបឋមសិក្សាព្រះនរោត្តម តាមបណ្ដោយផ្លូវព្រះនរោត្តម ស្ថិតក្នុងសង្កាត់ផ្សារកណ្ដាល២ ខណ្ឌដូនពេញ។
តាមប្រភពពត៌មានបានឲ្យដឹងថា មុនពេលកើតហេតុគេសង្កេតឃើញ ជនរងគ្រោះ៣នាក់ខាងលើ ជិះម៉ូតូមួយគ្រឿងម៉ាក សេ១២៥ ពណ៌ខ្មៅ ស៊េរីឆ្នាំ២០១២ ពាក់ស្លាកលេខភ្នំពេញ 1AW-3481 ជិះតាមបណ្ដោយផ្លូវព្រះនរោត្តម ខណៈពេលត្រូវក្មេងស្ទាវមួយក្រុមជិះម៉ូតូដេញតាមពួកគេ លុះដល់ចំណុចកើតហេតុខាងលើ ដោយសារតែភ័យពេក ក៏ជ្រុលល្បឿនទៅបុកខឿនថ្នល់ បណ្ដាលឲ្យដួលម៉ូតូបោកក្បាលស្លាប់ម្នាក់ភ្លាមៗនៅនឹងកន្លែង កើតហេតុ និង២នាក់ទៀតរងរបួសបាក់ដៃបាក់ជើងត្រូវបញ្ជូនទៅសង្គ្រោះនៅ មន្ទីរពេទ្យ។ បុរសរងគ្រោះទាំង៣នាក់ខាងលើនេះ នៅមិនទាន់ត្រូវបានគេស្គាល់អត្តសញ្ញាណនៅឡើយទេ។
ក្រោយពេលកើតហេតុសាកសពជនរងគ្រោះត្រូវសាច់ញតិនាំយកទៅលំនៅឋាន ចំណែកម៉ូតូជនរងគ្រោះ ត្រូវសមត្ថកិច្ចចុះមកវាស់វែងនិងដកហូតយកទៅរក្សាទុកនៅអធិការដ្ឋាន នគរបាលខណ្ឌដើម្បីស្វែងរកក្រុមក្មេងស្ទាវខូចទាំងនោះយកចាត់ការតាម ផ្លូវច្បាប់៕
ដោយ៖ ហេង នាង
