មូលនិធិរូបិយវត្ថុអន្តរជាតិព្យាករអំពីការធ្លាក់ចុះថយនៃបណ្ដាសេដ្ឋកិច្ចដែលទើបលូតលាស់
មូលនិធិរូបិយវត្ថុអន្តរជាតិឬ IMF និយាយថា ការធ្លាក់ចុះថយនៃបណ្ដាសេដ្ឋកិច្ចដែលទើបលូតលាស់ បានបង្ខំឲ្យស្ថាប័នពិភពលោកនេះកែបន្ថយតួលេខព្យាករណ៍របស់ខ្លួនស្ដីពី ការលូតលាស់សេដ្ឋកិច្ចសកល លោក។
មូលនិធិ រូបិយវត្ថុអន្តរជាតិ និយាយថា ការគំរាមដកចេញកញ្ចប់បង្កសន្ទុះសេដ្ឋកិច្ចនៅអាម៉េរិកបានបង្កឲ្យ វិនិយោគិនទាំងឡាយដកសាច់ប្រាក់ចេញពីការដាក់ទុននៅបណ្ដាប្រទេស ដែលទើបលូតលាស់ ដែលធ្វើឲ្យប៉ះពាល់ដល់សេដ្ឋកិច្ចទាំងនោះជាខ្លាំង។
មូលនិធិរូបិយវត្ថុអន្តរជាតិថា ការលូតលាស់សកលលោក នឹងមានកម្រិត 2.9% នៅឆ្នាំនេះ។
ការកែប្រែតួលេខព្យាករណ៍របស់មូលនិធិរូបិយវត្ថុអន្តរជាតិចំពោះបណ្ដាប្រទេសអាស៊ីដែលកំពុងរីកចម្រើន នេះធ្វើឲ្យប្រទេសអូស្រ្តាលីប្រឈមមុខនឹងការ រងគ្រោះ។
IMF និយាយថា ការលូតលាស់នៃប្រទេសអូស្រ្តាលីនឹងមានកម្រិត 2.5% ដែលជាការថយចុះពី កម្រិត 3% ព្យាករដោយ IMF កាលពីខែមេសា។
លោក Joe Hockey រដ្ឋមន្រ្តីផែនការថវិកាជាតិអូស្រ្តាលីមានប្រសាសន៍ថា ការព្យាកររបស់ IMF បញ្ជាក់អំពីហានិភ័យទុកជាមុនសម្រាប់សេដ្ឋកិច្ចប្រទេសអូស្រ្តាលី។
\មូលនិធិ រូបិយវត្ថុអន្តរជាតិក៏ព្រមានឲ្យដឹងថា ការដែលសហរដ្ឋអាម៉េរិកមិនអាចសងបំណុលគេបាននោះ អាចបង្កឲ្យមានការខូចខាតដល់សេដ្ឋកិច្ចសកលលោកយ៉ាងធ្ងន់ធ្ងរ។
ភាព គាំងស្ទះរកច្រកចេញមិនរួចក្នុងការដោះស្រាយរឿងសងបំណុលនៅសហរដ្ឋ អាម៉េរិក កំពុងតែធ្វើឲ្យបណ្ដាវិនិយោគិនបាត់បង់ការជឿជាក់ទៅលើផ្សារហ៊ុន អាម៉េរិកកាលពីយប់មិញនេះ៕ (Radio Australia)
