Cambodia News និងសាកលវិទ្យាល័យខេមរៈបណ្តុះបណ្តាលព័ត៌មានប្រជាពលរដ្ឋ
ដោយ រតនៈ
សារព័ត៌មាន Cambodia News
ភ្នំពេញ (៦ កុម្ភៈ ២០១៤)៖ ដើម្បីជួយបង្កើនការយល់ដឹង ពីមុខវិជ្ជាសារព័ត៌មាននិងក្រមសីលធម៌ព័ត៌មានជាទូទៅដល់អ្នកដែល មិនមែនជាព័ត៌មាន សារព័ត៌មានឃែមបូឌា ញូស៌ សហការជាមួយសាកលវិទ្យាល័យខេមរៈរបស់លោកបណ្ឌិត សុខ ទូច រៀបចំវគ្គបណ្តុះបណ្តាលមួយស្តីពីមុខវិជ្ជានេះ នៅឯសាកលវិទ្យាល័យខេមរៈ។
វគ្គបណ្តុះបណ្តាលដែលមានរយៈពេលពីរថ្ងៃពេញ គឺនៅថ្ងៃសៅរ៍ទី ៨ និងថ្ងៃអាទិត្យទី៩ កុម្ភៈនេះនឹងផ្តោតលើប្រធានបទមួយចំនួនរួមមាន៖ ការសរសេរព័ត៌មានឲ្យបានពេញលេញ និងច្បាស់លាស់សម្រាប់បង្ហោះលើគេហទំព័រ Blog និង Facebook ការថតរូបព័ត៌មាន និងបច្ចេកទេសសម្ភាស ព្រមទាំងក្រមសីលធម៌ព័ត៌មានផងដែរ។
លោក ឆាយ សុផល និពន្ធនាយកសារព័ត៌មាន Cambodia News បានមានប្រសាសន៍ថា វគ្គបណ្តុះបណ្តាលនេះនឹងជួយឲ្យប្រជាពលរដ្ឋទូទៅដែលមាន ចំណាប់អារម្មណ៍លើវិស័យព័ត៌មានបានយល់ដឹងបន្ថែមនៅក្នុងសម័យកាល នៃការរីកចម្រើនដ៏គំហុករបស់បណ្តាញព័ត៌មានសង្គម ដូចជា Facebook និង YouTube ជាដើម។
លោកបានបញ្ជាក់ថា បើទោះជាប្រជាពលរដ្ឋមិនមែនជាអ្នកព័ត៌មានអាជីពក៏ដោយ ក៏ពួកគាត់អាចធ្វើជាអ្នកសារព័ត៌មានប្រជាពលរដ្ឋ (Citizen Journalist) ដោយរាយការណ៍ព័ត៌មានតាមវិទ្យុ ទូរទស្សន៍ និងគេហទំព័រ ពិសេសនៅតាមហ្វេសប៊ុក ប្រកបដោយការទទួលខុសត្រូវ និងមានសីលធម៌។
គួរបញ្ជាក់ថា កន្លងមក Cambodia News បានសហការជាមួយស្ថាប័នរាជរដ្ឋាភិបាលនិងអង្គការសង្គមស៊ីវិលជាច្រើន ក្នុងការបណ្តុះបណ្តាលវគ្គខ្លីៗស្តីពីការសរសេរព័ត៌មាន ប៉ុន្តែនេះជាលើកដំបូងហើយដែល Cambodia News បានសហការជាមួយសាកលវិទ្យាល័យ ដើម្បីបណ្តុះបណ្តាលមុខវិជ្ជានេះ៕
ដំណឹងទាក់ទិននឹងការសិក្សា សូមទាក់ទងសាកលវិទ្យាល័យខេមរៈរបស់លោកបណ្ឌិត សុខ ទូច តាមទូរស័ព្ទ ០៩៣ ៧៧ ៩៩ ១៣
