សំណង់បុរី 999 និងខុនដូត្រូវបានផ្អាកការសាងសង់
សារព័ត៌មាន Cambodia News
ភ្នំពេញ (០៨ ធ្នូរ ២០១៤) ៖ សំណង់ និងខុនដូរបស់បុរី999ត្រូវបានផ្អាកការសាងសង់ធ្វើឲ្យមេការទទួលម៉ៅការនិងក្រុម កម្មករសំណង់ត្រឡប់ទៅស្រុកកំណើតរៀងៗខ្លួនវិញ ដោយកម្មករខ្លះនិយាយថាគ្មានអ្នកទទួលខុសត្រូវក្រោយពីលោកឧកញ៉ា ថោង សារ៉ាត បានរត់គេចខ្លួនពីការតាមប្រមាញ់របស់សមត្ថកិច្ចពាក់ ព័ន្ធនឹងករណីជាមេក្លោងបាញ់សម្លាប់លោកឧកញ៉ា អ៊ឹង ម៉េងជឺ កាលពីយប់ថ្ងៃទី២២ ខែវិច្ឆិកា ឆ្នាំ២០១៤។
បុរសម្នាក់ជាមេការសំណង់នៅក្នុងបុរី999ក្បែរពេទ្យមិត្តភាពខ្មែរ-សូវៀតសូមមិនប្រាប់ ឈ្មោះបានបញ្ជាក់ឲ្យដឹងថា សំណង់បុរី999និងខុនដូជាច្រើនកន្លែងរបស់លោក ថោង សារ៉ាត់ ត្រូវបានផ្អាកការសាងសង់ទាំងអស់ ក្រោយពីម្ចាស់បុរីមានបញ្ហា។
ជាមួយគ្នានេះផងដែរ ប្រភពពីអតិថិជនម្នាក់ដែលបានកក់ប្រាក់ទិញផ្ទះក្នុងបុរី999ក៏បាន សម្តែងក្តីបារម្ភថា គាត់អាចដកប្រាក់កក់បានមកវិញដូចម្តេចបាន ហើយទៅដកប្រាក់ពីអ្នក ណា។ ប្រភពពីអតិថិជនដដែលបន្តថា មិនមែនតែរូបគាត់ម្នាក់ប៉ុណ្ណោះទេ គឺមានមនុស្សជាច្រើននាក់ ផ្សេងទៀតក៏ដូចគាត់ដែរកំពុងព្រួយបារម្ភក្នុងបញ្ហានេះ៕
