សម រង្ស៊ី ប្រកាសមិនចូលក្នុងរដ្ឋាភិបាល និងមិនចូលក្នុងសភា
ភ្នំពេញ: តាមរយៈទំព័រហ្វេសប៊ុកផ្ទាល់ខ្លួន របស់ លោក សម រង្ស៊ី ប្រធាន គណបក្សសង្គ្រោះជាតិ នៅថ្ងៃទី១៩ ខែកញ្ញា នេះ បានបញ្ជាក់ពីជំហររបស់ខ្លួនថា គណបក្សសង្គ្រោះជាតិ នឹងមិនចូលរួមក្នុង រដ្ឋាភិបាល និងមិនចូលក្នុងសភាឡើយ ដរាបណាមិនទាន់មានការធានាថា សេចក្តីសង្ឃឹម នៃប្រជារាស្ត្រខ្មែរនឹងក្លាយទៅជាការពិត។
លោក សម រង្ស៊ី បានជម្រាបជូនប្រជាពលរដ្ឋថា “ សូមបងប្អូនជនរួមជាតិ កុំព្រួយបារម្ភពីគោលជំហររបស់គណបក្សសង្គ្រោះជាតិ! គណបក្ស សង្គ្រោះជាតិ ប្រកាន់គោលជំហរដ៏រឹងមាំដដែល។ ជួបមិនមានន័យថា ចូលទេ ” ។
លោក សម រង្ស៊ី បានអះអាងទៀតថា “ជួបគ្រាន់តែជាការបង្ហាញពីសុជីវធម៌ និងពីជំហរអហិង្សារបស់យើងដែលតម្រូវឲ្យរកដំណោះស្រាយ ចំពោះរាល់បញ្ហាដោយសន្តិវិធី។ តែដរាបណា មិនទាន់មានដំណោះស្រាយ ប្រកបដោយយុត្តិធម៌ជូនម្ចាស់ឆ្នោត ហើយដរាបណាមិនទាន់មានការធានាថា សេចក្តីសង្ឃឹម នៃប្រជារាស្ត្រខ្មែរ នឹងក្លាយទៅជាការពិត គឺសង្គ្រោះជាតិដាច់ខាតឲ្យ ទាល់តែបាននោះយើងដាច់ខាតក៏មិនព្រមចូលជាមួយភាគីមួយទៀតទេ”។
ចំណែកខាងគណបក្សប្រជាជនកម្ពុជាវិញ នៅថ្ងៃទី១៩ ខែកញ្ញានេះ បានប្រកាសក្នុងសេចក្តីថ្លែងការណ៍ចំហរថា ខ្លួននឹងនឹងដង្ហែតាមព្រះមហាក្សត្រ ហើយនឹងចូលរួមប្រជុំរដ្ឋសភា អាណត្តិទី៥ លើកដំបូង នៅថ្ងៃទី២៣ ខែកញ្ញាខាងមុខនេះ៕ Cambodia News
