សូដា នីតា វិលពីអាមេរិក ក្តាប់កិច្ចការសិល្បៈសារជាថ្មី
សារព័ត៌មាន Cambodia News/
ភ្នំពេញ (១៤ ឧសភា ២០១៤) ៖ កញ្ញាសូដា នីតា ទើបតែវិលត្រឡប់មកពីការសម្តែងនៅអាមេរិក កាលពីដើមខែនេះប៉ុណ្ណោះ បន្ទាប់ពីដឹកដៃកំលោះសាច់ស លោកអែន ឌី ទៅច្រៀងរាំនៅទីនោះអស់រយៈពេលជាង៤ខែ ។
គ្រាន់តែវិលមកវិញភ្លាម សូដា នីតា មិនដំអក់សម្ងំនៅផ្ទះសម្រាកកាយឱ្យបាត់ល្វើយខ្លួនទេ នាងបានច្បាមកិច្ចការសិល្បៈទាំងអស់ភ្លាមៗ បើទោះបីជានាងសល់លុយច្រើនពីការសម្តែងនៅអាមេរិកក៏ដោយនោះ ។
ក្នុងជំនួបចុងក្រោយមួយ ពេលកំពុងបង្ហាញវត្តមាននៅស្ថានីយទូរទស្សន៍អប្សរានៅក្នុងកម្ម វិធី «មេផ្ទះលេខ១» កញ្ញាសូដា នីតា បានរៀបរាប់ដំណើរចេញទៅអាមេរិកថា នាងសម្តែងនៅទីនោះកន្លងមក បានរយៈពេល៤ខែជាង នៅពេលដែលនាងកំពុងតែមមាញឹកកិច្ចការនៅក្នុងប្រទេស ។
៤ខែជាងនៅអាមេរិក ជាពេលវេលាមួយដែលនាងមានភាពនឹករំលឹកចំពោះស្រុកទេសជាខ្លាំង ហើយក៏ជាពេលវេលាមួយដែលនាងនៅដិតដាមដោយអនុស្សាវរីយ៍ជាច្រើននៅ លើទឹកដីអាមេរិកដែលកើតចេញពីការស្រឡាញ់គាំទ្ររបស់ប្រជាជនខ្មែរនៅ ទីនោះធ្វើឱ្យយើងបានបាត់ក្តីនឿយហត់នឹកស្រុកទេសខ្លះ ។
សូដា នីតា បានឱ្យដឹងទៀតថា ការងារសិល្បៈ គឺនាងបានទទួលពេញដៃដូចមុនដដែល ដូចជាធ្វើជាពិធីការិនីនៅហង្សមាស ស៊ីធីអិន និងនៅទូរទស្សន៍ជាតិ ហើយមានកិច្ចការផ្សេងទៀតដែលត្រូវដើរបង្ហាញម៉ូដរាប់ទាំងការឡើង ច្រៀង សម្តែងនៅលើកញ្ចក់ទូរទស្សន៍មួយផ្នែកទៀត ៕
